აფხაზეთში ვერ შეძლეს ინტერნეტის გამორთვა მაინინგთან საბრძოლველად – TASS

რუსულ სამთავრობო გამოცემა “TASS-თან” აფხაზეთის კომუნიკაციების, მასობრივი კომუნიკაციებისა და ციფრული განვითარების კომიტეტში განუცხადეს, რომ სატელეკომუნიკაციო ოპერატორები არ არიან მზად მაინინგთან საბრძოლველად გამორთონ ინტერნეტი, რადგან ისინი დიდ ფინანსურ ზარალს განიცდიან, მათ შორის იმის გამო, რომ მოსახლეობა კომუნიკაციებზე დახარჯული თანხების ანაზღაურებას მოითხოვს. ამიტომ, დე ფაქტო რესპუბლიკური შტაბის გადაწყვეტილებით სამშაბათს ღამით, ინტერნეტის გამორთვა ვერ მოხერხდა ენერგეტიკის სექტორში არსებულ ვითარების გამო.

ორშაბათს რესპუბლიკური შტაბის სხდომაზე თავმჯდომარემ, დე ფაქტო პრემიერ-მინისტრის მოვალეობის შემსრულებელმა, ვალერი ბგანბამ განაცხადა, რომ სამშაბათს ღამით ინტერნეტი გაითიშებოდა უკანონო მაინინგის წინააღმდეგ საბრძოლველად.

“ორშაბათ საღამოს რესპუბლიკური შტაბის სხდომის შემდეგ, გაიმართა შეხვედრა კომუნიკაციების ოპერატორებთან, რომლებსაც შეატყობინეს არსებული ვითარება და ინტერნეტის ღამით გათიშვის შესახებ გადაწყვეტილება. თუმცა, მათ განაცხადეს ტექნიკური სირთულეების შესახებ. ქსელის გათიშვის შემთხვევაში, პარალიზდება ბანკომატების მუშაობა, ბენზინგასამართ სადგურებზე მყოფი ხალხი ვერ გადაიხდის საბანკო ბარათითა და ა.შ. გარდა ამისა, ოპერატორებმა განაცხადეს, რომ ეს მათთვის დიდი ფინანსური ზარალის მომტანია. არ არის გამორიცხული, რომ აბონენტები, რომლებიც ყოველთვიურად იხდიან ინტერნეტის საფასურს, საკუთარი უფლებების ცოდნის შესაბამისად, დაიწყებენ გადახდილი თანხის დაბრუნებისთვის ბრძოლას, არ გამოირიცხება სასამართლო დავებიც. ამიტომ ინტერნეტის გათიშვა ვერ მოხერხდა,” – ამბობს კომიტეტის თანამშრომელი.

სამშაბათს, აქტივისტ ქალთა ჯგუფი დე ფაქტო პირველ ვიცე-პრემიერთან, ენერგეტიკისა და ტრანსპორტის მინისტრთა,ნ ჯანსუხ ნანბასთან მივიდა. მათ უკმაყოფილება გამოთქვეს ქვეყნის ენერგეტიკულ სექტორში კრიპტოვალუტის უკანონო მაინინგის გამო შექმნილ ვითარებაზე. ქალები დე ფაქტო ხელისუფლებისგან მაღაროელების წინააღმდეგ ბრძოლის გამკაცრებას ითხოვდნენ.

ნანბამ შესთავაზა მათ, დაესახელებინათ კონკრეტული მისამართები, სადაც განთავსებული შეიძლება იყოს კრიპტო ფერმები, რითაც შესაძლოა დახმარების გაწევა უსაფრთხოების ძალებისა და სხვა სტრუქტურებისთვის, რომლებიც მონაწილეობენ მაინინგთან ბრძოლის პროცესში.

“ვინც არ უნდა მოვიდეს ქვეყნის სათავეში, ენერგეტიკის სექტორში პრობლემები ერთ ღამეში ვერ მოგვარდება, ეს ძალიან დიდ ფინანსურ და ადამიანურ რესურსებს მოითხოვს,” – განაცხადა მან.

9 დეკემბრიდან აფხაზეთის დე ფაქტო რესპუბლიკაში ელექტროენერგიის გათიშვის კიდევ უფრო მკაცრი გრაფიკი ამოქმედდება. ამის შესახებ კომპანია “ჩერნომორენერგო” იტყობინება, რომელმაც პირველად გამოაქვეყნა არა გამორთვის, არამედ ჩართვის გრაფიკი.

“რესპუბლიკის ენერგომომარაგებაში შექმნილი მძიმე ვითარებიდან გამომდინარე, 2024 წლის 9 დეკემბრიდან ამოქმედდება ელექტროენერგიის მიწოდების ახალი გრაფიკი. 21.00-დან 7.00 საათამდე ელექტროენერგიის მიწოდება შეზღუდვის გარეშე იქნება”, – ნათქვამია განცხადებაში.

07:00 საათიდან 21:00 საათამდე აბონენტები ელექტროენერგიას დღეში ორჯერ, 2 საათისა და 20 წუთის განმავლობაში მიიღებენ. ელექტროენერგიის მიწოდება უწყვეტი იქნება მხოლოდ ღამით – 21:00 საათიდან 07:00 საათამდე. ეს ნიშნავს, რომ დღის განმავლობაში მოსახლეობა ელექტროენერგიის გარეშე 9 საათისა და 20 წუთის განმავლობაში დარჩება.

მანამდე, ენერგეტიკულ პრობლემებზე გამართულ შეხვედრაზე, დე ფაქტო ხელისუფლებამ განაცხადა, რომ რუსეთიდან კომერციული ნაკადების შეჩერების შემთხვევაში, მოსახლეობას ელექტროენერგია დღეში მხოლოდ 7-8 საათის განმავლობაში ექნება.

მიმდინარე ვითარება დაკავშირებულია ენგურჰესის ჯვრის წყალსაცავში წყლის დაბალ დონესთან და რუსეთიდან კომერციული ნაკადების კომერციული ფასად გადახდის აუცილებლობასთან.