გავრეცხოთ მომინანქრებული ქვაბი

ნებისმიერი ჭურჭელი დროთა განმავლობაში კარგავს თავის პირვანდელ იერს. ეს განსაკუთრებით ეხება იმ ჭურჭელს, რომელსაც ხშირად ვდებთ გაზქურაზე. ჭურჭელზე ჩნდება ნადები, ლაქები და სუნი რჩება ქვაბის ზედაპირზე. ასეთი ლაქების მოშორება საკმაოდ რთულია. მინანქრის საფარიც კი არ იცავს ჭურჭელს ამისგან. პაპარაცის დღევანდელ სტატიაში გაგიზიარებთ საიდუმლოებას, თუ როგორ უნდა გარეცხოთ მომინანქრებული ქვაბი.

ორიოდე თვის წინ დედამთილმა მაჩვენა მარტივი ხრიკი, თუ როგორ უნდა გაირეცხოს მომინანქრებული ქვაბი მარტივი ხალხური საშუალების გამოყენებით. ყოველთვის მაინტერესებდა, როგორ ხდებოდა, რომ მის ჭურჭელზე ერთი ლაქაც არ იყო არასოდეს. მისი ძველი ქვაბებიც კი ყოველთვის ბრწყინავდა, მაშინ როცა ჩემი ქვაბები კარგავს პირვანდელ სახეს, უკვე რამდენიმე თვის გამოყენების შემდეგ. რამდენჯერაც არ უნდა გავრეცხო, მინანქარზე მაინც რჩება მუქი ლაქები და ის ფერს იცვლის. აღმოჩნდა, რომ ჩემი დედამთილი განსაკუთრებულ მეთოდს იყენებს. მაშინაც კი, თუ მომინანქრებული ქვაბი უკვე გაშავებულია, ის შეიძლება დაუბრუნდეს თითქმის პირვანდელ მდგომარეობას. აი, რა დაგჭირდებათ ამისთვის.

როგორ მოვაშოროთ მინანქარს სიშავე

იმისათვის, რომ მომინანქრებულ ქვაბს სიშავე მოაშოროთ, დაგჭირდებათ ჩვეულებრივი მათეთრებელი ფხვნილის სახით. შეგიძლიათ გამოიყენოთ ნებისმიერი. პროცედურა:

1. ჯერ მთლიანად შეავსეთ პრობლემური ქვაბი წყლით და შედგით გაზქურაზე ასადუღებლად. სანამ წყალი გაცხელდება, თანდათან დაამატეთ მასში 1 კოვზი მათეთრებელი ფხვნილი. ქვაბის ზომისა და დაბინძურების სირთულის მიხედვით დაგჭირდებათ დაახლოებით 1 ს/კ – 1 ლიტრ მოცულობაზე.

2. მას შემდეგ, რაც წყალი რამდენჯერმე ადუღდება, დატოვეთ ხსნარი გაზქურაზე კიდევ 5 წუთის განმავლობაში. ამის შემდეგ გადმოდგით მომინანქრებული ქვაბი ცეცხლიდან და ჩაასხით წყალი. ქვაბი გვერდზე გადადეთ, რომ ოდნავ გაცივდეს. შემდეგ გარეცხეთ ღრუბლით და ჩვეულებრივი სარეცხი საშუალებით (არ გამოიყენოთ ჯაგრისი) და კარგად გაავლეთ. მასში მათეთრებელი საშუალების კვალი არ უნდა დარჩეს. როგორც წესი, სიშავე პირველი პროცედურის შემდეგვე ქრება. თუმცა, თუ ქვაბი ძველია, უკეთესი ეფექტისთვის შეგიძლიათ პროცედურის გამეორება ორჯერ.

როგორ მოვაშოროთ ნადები მომინანქრებულ ქვაბს

როდესაც ქვაბი ძველია და აქვს ნადები, ჩემი დედამთილის რჩევით უნდა ვცადოთ სხვა ეფექტური საშუალება.

• 1. სოდა-მარილის ხსნარი ხელს შეუწყობს ჩამჯდარი ნადების მოშორებას. ამისათვის ქვაბში ჩაყარეთ ჩვეულებრივი სუფრის მარილი ისე, რომ ძირი მთლიანად დაიფაროს. საკმარისად დიდი ქვაბისთვის შეიძლება დაგჭირდეთ დაახლოებით 1 ჭიქა მარილი. დაუმატეთ მას რამდენიმე სუფრის კოვზი სოდა. დაასხით 2 ჭიქა წყალი.
• 2. ქვაბი დადგით დაბალ ცეცხლზე და ადუღეთ 30 წუთის განმავლობაში. სითხის ადუღების შემდეგ გარეცხეთ ქვაბი. ნადები მთლიანად მოშორდება.

როგორც ხედავთ, არაფერია უფრო ადვილი ვიდრე მომინანქრებული ქვაბის პირვანდელი მდგომარეობის აღდგენა. ახლა, როცა უკვე იცით, როგორ მოაშოროთ მომინანქრებულ ქვაბს სიშავე და ნადები, თქვენი ჭურჭელი ყოველთვის სუფთა იქნება.