ზელენსკის, მაკრონის და ტრამპის შეხვედრამ პარიზში 35 წუთს გასტანა

პარიზში ღვთისმშობლის განახლებული ტაძრის კვლავ გახსნის ცერემონიაზე ჩასული, აშშ-ის პრეზიდენტად არჩეული დონალდ ტრამპი და უკრაინის პრეზიდენტი, ვოლოდიმირ ზელენსკი ერთად შეხვდნენ მათ ფრანგ კოლეგა ემანუელ მაკრონს.

შეხვედრამ 35 წუთს გასტანა, გაავრცელა ინფორმაცია “ევროპეისკაია პრავდამ,” რომელიც ეყრდნობა უკრაინის პრეზიდენტის პრესმდივანს, სერგიი ნიკიფოროვს.

ნიკიფოროვის თანახმად, შეხვედრა, რომლის დროსაც სამი პოლიტიკოსის გარდა ოთახში არავინ იყო, დასრულდა. მანვე დასძინა, რომ შეხვედრის შემდეგ სამეულს პრესისთვის განცხადება არ გაუკეთებია.

ზელენსკიმ მაკრონსა და ტრამპთან შეხვედრამდე ისაუბრა საქართველოს პრეზიდენტთან, სალომე ზურაბიშვილთან, რომელსაც ქართველი ხალხის სრული მხარდაჭერა და სოლიდარობა აღუთქვა. პრესაში გამოჩნდა ცნობა, რომ შესაძლებელი იყო ზურაბიშვილის შეხვედრა ტრამპთანაც.