თბილისის მერია 2025 წელს რუსთაველის გამზირის რეაბილიტაციის დაწყებას გეგმავს

თბილისის მერმა კახა კალაძემ დედაქალაქის მომდევნო წლის ბიუჯეტის დამტკიცების შემდეგ ჟურნალისტებს უამბო დაგეგმილი სამუშაოების ეტაპების შესახებ:

„პირველი რაც გაკეთდება, არის საგზაო ინფრასტრუქტურის სრული მოწესრიგება თავისი მიწისქვეშა კომუნიკაციებით. შემდეგი ეტაპი იქნება შენობა-ნაგებობების განახლება, რეაბილიტაცია, ბევრი კულტურული მემკვიდრეობის ძეგლია და ამას გარკვეული დრო დასჭირდება, თუმცა პირველი ეტაპი მხოლოდ და მხოლოდ საგზაო ინფრასტრუქტურის მოწესრიგება იქნება, თავისი გამწვანებული თარგებით, მიწისქვეშა კომუნიკაციებით“.

მერს არ უთქვამს სამუშაოების დაწყების თარიღი.

კახა კალაძემ ჯერ კიდევ 2023 წლის ნოემბერში განაცხადა, რომ რუსთაველის გამზირის სამუშაოები 2024 წლიდან დაიწყებოდა. ის ამბობდა, რომ სარეაბილიტაციო სამუშაოები 2 წელზე მეტხანს გაგრძელდება.

რუსთაველის გამზირზე, პარლამენტის შენობასთან ბოლო 27-ე დღეა ათასობით ადამიანი ითხოვს ხელახალ არჩევნებს. ხალხმრავალი პროტესტი გამოიწვია „ქართულ ოცნებაში“ მიღებულმა გადაწყვეტილებამ, რომლის მიხედვითაც, ხელისუფლება 2028 წლის ბოლომდე აღარ იქნება ინიციატორი ევროკავშირთან მოლაპარაკების გახსნის საკითხის.

28 ნოემბრის შემდეგ პროევროპულ აქციებზე დააკავეს 500-მდე ადამიანი, მათ შორის 30-ზე მეტი სისხლის სამართლის წესით. პოლიცია აქციებზე ძალადობდა მოქალაქეებსა და ჟურნალისტებზე. მათ შორის რამდენიმე ამ დრომდე აგრძელებს მკურნალობას.