თბილისსა და ქუთაისში შუაღამისას პოლიციამ რამდენიმე პირი დააკავა

10 დეკემბრის ღამეს თბილისსა და ქუთაისში პოლიციამ რამდენიმე პირი დააკავა.

03.00 საათისთვის  რუსთაველის გამზირზე მიმდინარე საპროტესტო აქცია უკვე დაშლილი იყო.  თუმცა მოქალაქეები, რომლებიც სახლში მიდიოდნენ, პოლიციამ სხვადასხვა ადგილას  დააკავა –  “მაგდონალდსთან”, “სტამბასთან” და ჭავჭავაძის გამზირზე. 

სოციალურ ქსელში რამდენიმე დაკავების ვიდეო გაავრცელეს მოქალაქეებმა. ერთ-ერთმა დაკავებულმა თორნიკე მსხილაძემ კი თავისი ჩხრეკა და დაკავება პირდაპირ ეთერში გაუშვა.

საიას ხელმზღვანელმა ნონა ქურდოვანიძემ შუაღამისას განაცხადა, რომ ღამე თბილისსა და ქუთაისში 7 პირის დაკავების/ჩხრეკის შესახებ შეატყობინეს არასამთავრობო ორგანიზაციების ცხელ ხაზზე.

“მათ შორის,  ერთი  სისხლით არის დაკავებული”, – აღნიშნავს ის.