civil ახალი ამბები 
„ერთიანმა ნაციონალურმა მოძრაობამ“ ოპოზიციის ალიანსი დატოვა. ეს ინფორმაცია „სამოქალაქო საქართველოს“ 3 ნოემბერს პარტიის პრესსამსახურში დაუდასტურეს. გადაწყვეტილებას წინ უძღოდა „ნაციონალურ მოძრაობასა“ და ალიანსის სხვა წევრებს შორის რამდენიმეთვიანი შიდა დაპირისპირება.
მართალია პარტიას არ დაუკონკრეტებია, თუ როდის მოხდა ოფიციალურად ალიანსის დატოვება, ინფორმაციის დადასტურების წინა დღეს ოპოზიციის ალიანსმა „ფეისბუქის“ გვერდზე პროფილის ფოტო შეცვალა. ალიანსის ლოგოდან, რომელზეც წევრი პარტიების სიმბოლიკაა გამოსახული, „ნაციონალური მოძრაობის“ ლოგო ამოღებულია.
„ნაციონალურ მოძრაობასა“ და ალიანსის პარტნიორებს, მათ შორის „ახალს“, „ფედერალისტებსა“ და „თავისუფლების მოედანს“ შორის უთანხმოებები უკვე თვეებია გრძელდება. პარტიების ლიდერები ერთმანეთს არაერთხელ აკრიტიკებდნენ და ბრალდებებს უყენებდნენ.
პატიმრობაში მყოფმა ყოფილმა პრეზიდენტმა მიხეილ სააკაშვილმა არაერთხელ გამოთქვა უკმაყოფილება ალიანსის სტრატეგიის მიმართ. თავის მხრივ, ალიანსის წევრები აკრიტიკებდნენ სააკაშვილის გავლენას „ნაციონალური მოძრაობის“ პოლიტიკაზე. მათ მიაჩნდათ, რომ ის არ ითვალისწინებდა ერთიანობისკენ მიმართულ ძალისხმევას და საჯაროდ ესხმოდა თავს ოპოზიციურ ჯგუფებს.
დაპირისპირება საჯარო ივნისში გახდა, როდესაც პარტია „ახალის“ ლიდერმა ნიკა გვარამიამ განაცხადა, რომ „ნაციონალური მოძრაობა“ ფაქტობრივად ჩამოშორდა ალიანსს. მისი თქმით, პარტიის წარმომადგენლები აღარ ესწრებოდნენ შეხვედრებს და არც 26 მაისის აქციის ორგანიზებაში მიუღიათ მონაწილეობა.
„ნაციონალური მოძრაობის“ გასვლა პარტიაში მიმდინარე შიდა რეორგანიზაციისა და „რეფორმების“ პროცესს დაემთხვა, რამაც პარტიის შიგნით დამატებითი უთანხმოებები გამოიწვია.
This post is also available in:
