რუსეთმა ოკუპირებული აფხაზეთისთვის "ელექტროენერგიის ჰუმანიტარული მიწოდება" დაიწყო

რუსეთმა ოკუპირებულ აფხაზეთში დაიწყო ელექტროენერგიის ჰუმანიტარული მიწოდება, ამის შესახებ დე ფაქტო რესპუბლიკის ენერგეტიკისა და ტრანსპორტის ე,წ სამინისტროზე დაყრდნობით ინფორმაციას რუსეთის სახელმწიფო საინფორმაციო სააგენტო ტასსი ავრცელებს.

„დღეს 07:00 საათიდან დაიწყო რუსეთიდან ჰუმანიტარული ელექტროენერგიის მიწოდება“ - განაცხადა ე.წ. ვიცე პრემიერის მოვალეობის შემსრულებელმა, „ენერგეტიკისა და ტრანსპორტის მინისტრმა“ ჯანსუღ ნანბამ.

„ჩერნომორენერგოს“ პრესცენტრში აცხადებენ, რომ რუსეთიდან მიწოდების დაწყების შემდეგ ამოქმედდა ელექტროენერგიის მიწოდების მანამდე არსებული გრაფიკი, რომელიც 1 ნოემბრიდან მოქმედებდა და ითვალისწინებდა ოთხსაათიან შეზღუდვას, ორ-ორი საათით დღისა და ღამის მონაკვეთებში.

მიწოდებული ელექტროენერგიის ლიმიტი 327 მლნ კილოვატსაათია.

„ჩერნომორნერგოში“ აცხადებენ, რომ ამ მოცულობის ელექტროენერგია გრაფიკის არსებობის პირობებში იანვარ-თებერვლამდე იქნება საკმარისი.

ოკუპირებული აფხაზეთისთვის ელექტროენერგიის მიწოდება რუსეთმა ე.წ. პრეზიდენტის მოვალეობის შემსრულებლის ბადრი გუნბას მიმართვის საფუძველზე დაიწყო. გუბნას თავის კანდიდატურა აქვს დასახელებული დე ფაქტი პრეზიდენტის არჩევნებზე, რომელიც 15 თებერვალსაა დანიშნული. სოციალურ ქსელებში წერენ, რომ ეს მისი კანდიდატურისადმი მოსკოვის მხარდაჭერაზე მეტყველებს.
ტელეგრამის არხებზე წერდნენ, რომ მოსკოვის დროით 10:00 საათზე აფხაზეთი უშუქოდ დარჩა, თუმცა ელექტრომომარაგება რამდენიმე წუთში აღდგა.