რუსთაველის გამზირზე დაიწყო საპროტესტო აქცია

დემონსტრანტებმა ნაძვის ხის კონსტრუქციაზე, რომლის მონტაჟი თბილისის მერიამ 8 დეკემბერს გამთენიისას დაიწყო, საპროტესტო აქციების დარბევისას დაშავებული და დასახიჩრებული ადამიანების ფოტოები ჩამოკიდეს. ნაძვის ხეს ასევე ამშვენებს საქართველოს, უკრაინის, აშშ-ისა და ევროკავშირის დროშები.

რუსთაველის გამზირზე შეკრებილი მოქალაქეები დამნაშავეების გამოვლენასა და დასჯასთან ერთად, ასევე მოითხოვენ იმ პირთა გათავისუფლებას, რომლებიც საპროტესტო გამოსვლების დროს ან დასრულების შემდეგ დააკავეს.

საპროტესტო აქციის მონაწილეები “ქართული ოცნების“ 28 ნოემბრის გადაწყვეტილებას აპროტესტებენ, რომლის თანახმად, საქართველო 2028 წლის ბოლომდე ევროკავშირთან მოლაპარაკებების გახსნის საკითხს ხსნის დღის წესრიგიდან. საპროტესტო აქციების მონაწილეების მოთხოვნა უცვლელია - დაინიშნოს ხელახალი საპარლამენტო არჩევნები და გათავისუფლდნენ დაკავებული მოქალაქეები.

მეთერთმეტე ღამეა, თბილისში დემონსტრაციები იმართება.

მოქალაქეები ხელისუფლების გადადგომას ითხოვენ პრემიერ-მინისტრის 28 ნოემბრის განცხადების გამო. ისინი ითხოვენ ხელახალი საპარლამენტო არჩევნების ჩატარებასაც.

„ქართულ ოცნებაში“ გადაწყვიტეს, რომ 2028 წლის ბოლომდე დღის წესრიგში არ დააყენონ ევროკავშირთან საქართველოს წევრობაზე მოლაპარაკების გახსნის საკითხი და 2028 წლის ბოლომდე უარს ამბობენ ევროკავშირის საბიუჯეტო გრანტებზე.

6-7 დეკემბრის ღამეს, აქციის დაშლისას, სპეცრაზმის თანამშრომლებმა 48 პირი დააკავეს. დემონსტრანტების დაკავებისას გადაღებულ კადრებში ჩანს, რომ დაკავებისას სპეცრაზმი მათ ფიზიკურად გაუსწორდა. იმავე ღამეს საპოლიციო ძალებმა დემონსტრანტების დასაშლელად გამოიყვანეს წყლის ჭავლის მანქანა და დიდი რაოდენობით ცრემლსადენი აირი.

შინაგან საქმეთა სამინისტროს მიერ 8 დეკემბერს მონაცემებით, 28 ნოემბრიდან დღემდე გამართული აქციის ფარგლებში სისხლის სამართლებრივი წესით პასუხისგებაშია მიცემული 30-ზე მეტი პირი. ასევე, ადმინისტრაციული წესით დაკავებულია და საქმის წარმოება დაწყებულია 372 პირის მიმართ, საიდანაც 62 პირის მიმართ უკვე გამოყენებულია ადმინისტრაციული პატიმრობა, ხოლო 100-ზე მეტი პირის მიმართ - ჯარიმა, როგორც სახდელის სახე. დანარჩენი პირების მიმართ გრძელდება სასამართლო განხილვები.

შს სამინისტროს არ ჯერ არ გაუვრცელებია ინფორმაცია, ძალის გადამეტების ან კანონდარღვევის გამო პასუხისგებაში მიცემული პოლიციელების შესახებ.