სირიაში სურთ მეამბოხეთა ჯგუფები დაუქვემდებარონ თავდაცვის სამინისტროს

სირიის ამჟამინდელმა, დე-ფაქტო ლიდერმა, აჰმედ ალ-შარამ 24 დეკემბერს მეამბოხეთა ფორმირებების ყოფილ მეთაურებთან მიაღწია შეთანხმებას, რომლის თანახმადაც ეს დაჯგუფებები დაიშლებიან და ერთიანად იქნებიან კონსოლიდირებული, თავდაცვის სამინისტროს ხელმძღვანელობით - იუწყება ახალი ადმინისტრაცია.

გასულ კვირაში სირიის პრემიერ-მინისტრი, მუჰამედ ალ-ბაშირი აცხადებდა, რომ სამხედრო უწყება რესტრუქტურიზაციას უნდა დაექვემდებაროს, და ამ პროცესმა უნდა მოიცვას მეამბოხეთა დაჯგუფებები და ის ოფიცრები, რომლებიც დეზერტირები იყვნენ ყოფილი პრეზიდენტის, ბაშარ ალ-ასადის არმიაში.

სააგენტო Reuters-ი აღნიშნავს, რომ ალ-შარა რთული ამოცანის წინაშეა, მან თავიდან უნდა აირიდოს შეტაკებები ასადის აწ უკვე დამხობილი რეჟიმის ბევრ მოწინააღმდეგეს შორის.

სირიის დროებით მთავრობაში თავდაცვის მინისტრად დაინიშნა მურჰაფ აბუ კასრა - ერთ-ერთი ხელმძღვანელი დაჯგუფებისა "ჰაიათ თაჰრირ აშ-შამი", რომელიც ასადის რეჟიმის დამხობის ძალისხმევის სათავეში იყო. აშშ-ში და ბევრ სხვა ქვეყანაში ამ ჯგუფს ტერორისტულად მიიჩნევენ. აჰმედ ალ-შარა ლიდერია ჯგუფისა "ჰაიათ თაჰრირ აშ-შამი".

ბოლო დღეებში დამასკში ჩასულ დასავლელ ოფიციალურ პირებთან საუბრებში აჰმედ ალ-შარა ირწმუნებოდა, რომ არ აპირებს შურისძიებას ყოფილი ხელისუფლების წევრებზე, და არც რეპრესიების გატარებას რელიგიური და ეთნიკური უმცირესობების წინააღმდეგ.