„სისხლის სამართლის კოდექსით“ 15 მომიტინგეა დაკავებული – შსს

შსს-ს თანახმად, საპროტესტო აქციების დაწყებიდან სისხლისსამართლებრივი ბრალდებით დაკავებულია 15 პირი.

მათგან 7-ს ბრალად ედება პოლიციელზე თავდასხმა, ან ნივთის დაზიანება და 7-ს ჯგუფური ძალადობის ორგანიზება, ხელმძღვანელობა, ან მონაწილეობა და ძალადობრივი ქმედებისკენ საჯაროდ მოწოდება. 1 დაკავებულია აფეთქების მომზადების ბრალდებით.

უწყების ცნობით, გუშინ, გვიან ღამით პოლიციამ სისხლისსამართლებრივი ბრალდებით თბილისში დააკავა 28 ნოემბრიდან მიმდინარე საპროტესტო აქციების კიდევ ერთი მონაწილე.

2006 წელს დაბადებულ ს.ჯ.-ს ბრალად ედება პოლიციელზე თავდასხმა.

გამოძიების თანახმად, „ბრალდებული, რომელიც დანით იყო შეიარაღებული, 30 ნოემბერს, რუსთაველის გამზირზე, აქციის მიმდინარეობისას შინაგან საქმეთა სამინისტროს თანამშრომელს ჯანმრთელობის დაზიანების მიზნით თავს დაესხა”.

დაკავებულს შვიდ წლამდე ვადით თავისუფლების აღკვეთა ემუქრება.