"ქალები დიდ იმედს წარმოადგენენ ამ ქვეყნის მომავლისთვის" - პრეზიდენტი ქალთა მარშს მცირე ხნით შეუერთდა

თბილისში გამართული ქალთა მარშის მონაწილეები ორბელიანების სასახლესთან მივიდნენ, რა დროსაც სალომე ზურაბიშვილი მათ მცირე ხნით შეუერთდა, მხარდაჭერა გამოუცხადა და შემაღლებული ადგილიდან მიმართა.

"ქალები არიან ყველაზე მაგარი ამ ქვეყანაში, ძალიან დიდ იმედს წარმოადგენენ ამ ქვეყნის დღევანდელი დღისთვის და მომავლისთვის და თავისუფალი საქართველოსთვის", - თქვა პრეზიდენტმა, რის შემდეგაც იგი კვლავ სასახლეში დაბრუნდა.

ქალების მარში 25 დეკემბერს, ფილარმონიის შენობის მიმდებარე ტერიტორიიდან დაიწყო. აქციის მონაწილეები, რუსთაველის გამზირის გავლით ორბელიანების სასახლესთან მივიდნენ, რის შემდეგაც მარში პარლამენტთან დაასრულეს.

ქალთა მარშს ზუგდიდშიც შეუერთდნენ. ქალები მთავარ ბულვარში შეიკრიბნენ, მოგვიანებით კი მსვლელობა გამართეს. რამდენიმე წუთით გადაკეტეს ქალაქის ცენტრალური გზა და მოქალაქეებს პროტესტში ჩართვისკენ მოუწოდეს.