Glovo და Wolt: ჩვენი ფიქრები დაზარალებული დემონსტრანტებისკენაა მიმართული

„როგორც ევროპული კომპანიები, ჩვენ ვაღიარებთ საქართველოს ისტორიული არჩევანის უზარმაზარ პოტენციალს ევროპასთან ინტეგრაციის მიმართულებით, რაც ქვეყნის ეკონომიკურ და სოციალურ მომავალს სთავაზობს, და ამიტომ სრულად ვუჭერთ მხარს საქართველოს ევროპულ მომავალს.

ჩვენი ფიქრები მშვიდობიანი დემონსტრანტებისკენ არის მიმართული, რომლებიც ამ რთულ კრიზისში დაზარალდნენ. ჩვენ მზად ვართ, მხარი დავუჭიროთ საქართველოს ევროპულ გზაზე, დარწმუნებულნი ვართ, რომ ეს გახსნის ახალ შესაძლებლობებს, გააძლიერებს ეკონომიკას და უზრუნველჰყოფს უფრო ნათელ და წარმატებულ მომავალს ყველასთვის“, - წერია განცხადებაში.

„თავისუფალი ბიზნესების პლატფორმის“ მონაცემებით, ამ ორივე კომპანიას ამ დრომდე [19 დეკემბერი, 14:00 სთ] არ დაუფიქსირებია პოზიცია ახალი არჩევნების დანიშვნისა და დაპატიმრებული დემონსტრანტების გათავისუფლებასთან დაკავშირებით.

პლატფორმა ბიზნესმენმა გიორგი ჩუგოშვილმა 15 დეკემბერს შექმნა. ახალი არჩევნების შესახებ მოთხოვნას უკვე შეუერთდა 1100-ზე მეტი კომპანია, მათ შორის არიან „კოკა-კოლა“, „მაგთი“, PSP, „ნიკორა“ და ა.შ.

პოზიცია არ დაუფიქსირებიათ ისეთ დიდ კომერციულ ბანკებს, როგორებიცაა „თიბისი ბანკი“, „საქართველოს ბანკი“, „ლიბერთი ბანკი“. თუმცა მათგან „თიბისი“ და „საქართველოს ბანკი“ 5 მილიონ ლარს გამოყოფენ პროევროპულ აქციებზე დაზარალებულთა და მცირე ბიზნესების დასახმარებლად.

პროევროპული საპროტესტო დემონსტრაციები საქართველოში 22-ე დღეა, გრძელდება.

დემონსტრაციებისას პოლიციელებმა არაერთ ადამიანზე იძალადეს როგორც დაკავებისას, ასევე დაკავების შემდეგ. დაშავდნენ ჟურნალისტებიც.

სახალხო დამცველი იუწყება, რომ მისმა წარმომადგენლებმა 28 ნოემბრიდან 16 დეკემბრის ჩათვლით კლინიკებსა და იზოლატორებში მოინახულეს 362 ადამიანი. მათგან:

• 227 მიუთითებდა არასათანადო მოპყრობაზე;
• 158-ს აღენიშნებოდა ხილული დაზიანებები.