radiotavisupleba ახალი ამბები 
ორშაბათს, სასამართლო ხელისუფლების საინფორმაციო სააგენტო Mizan-მა განაცხადა, რომ ირანში სიკვდილით დასაჯეს ორი კაცი, რომლებიც ისპაანში იანვრის საპროტესტო აქციების დროს ოთხი პოლიციელის დაღუპვასთან დაკავშირებით დააკავეს.
Mizan-ის ცნობით, ალირეზა სეფაჰის და ალირეზა რაეისის სიკვდილით დასჯა მიესაჯათ ისეთი ბრალდებების საფუძველზე
, როგორიცაა „შეიარაღებული ამბოხებული ჯგუფის წევრობა, ღვთის წინააღმდეგ ომის წარმოება იარაღის ტარებითა და შიშისა და უსაფრთხოების დათესვით, სიბილწის გავრცელებითა და ომისა და მკვლელობისაკენ წაქეზებით“.
სააგენტომ დასძინა, რომ უზენაესმა სასამართლომ ძალაში დატოვა მათთვის გამოტანილი განაჩენი და ისინი ორშაბათს დილით სიკვდილით დასაჯეს.
ირანში საპროტესტო გამოსვლები დაიწყო 2025 წლის 28 დეკემბერს და იანვარშიც გაგრძელდა, რასაც ირანის
უშიშროების ძალების მხრიდან სასტიკი რეპრესიები მოჰყვა.
მას შემდეგ ირანში სიკვდილით დასაჯეს მომიტინგეები და საპროტესტო გამოსვლებთან დაკავშირებით დაპატიმრებული პირები. მხოლოდ გასულ წელს, ირანში ათასზე მეტი პირი დასაჯეს სიკვდილით. ირანის სასამართლოები სასჯელის უმაღლეს ზომას ხშირად მიმართავენ ნარკოდანაშაულთან დაკავშირებული პირების მიმართ.
