#OK! Met Gala 2027 ჯონ გალიანოს მიეძღვნება

მეტროპოლიტენის ხელოვნების მუზეუმის კოსტიუმების ინსტიტუტმა 2027 წლის Met Gala-ს თემა ოფიციალურად დააანონსა – მომავალი წლის გამოფენა და გრანდიოზული საღამო მოდის ერთ-ერთ ყველაზე გავლენიან, თუმცა საკამათო დიზაინერს, ჯონ გალიანოს მიეძღვნება.

გამოფენას სახელწოდებით „John Galliano: Horizons“ ერქმევა და ის დიზაინერის მრავალწლიანი კარიერის სრულ ისტორიას მოიცავს — ლონდონის Central Saint Martins-ში სწავლის პერიოდიდან დაწყებული, Givenchy-სა და Maison Margiela-ში მუშაობით დამთავრებული.

გამოფენა ყურადღებას გაამახვილებს გალიანოსთვის დამახასიათებელ თეატრალურ სტილზე, ისტორიული ეპოქების გადმოცემის უნარზე და იმ უნიკალურ მიდგომაზე, რომელმაც ის თანამედროვე მოდის ერთ-ერთ ყველაზე გამორჩეულ ფიგურად აქცია.

რატომ არის გალიანოსადმი მიძღვნილი Met Gala კრიტიკის ობიექტი?

ეს მხოლოდ მესამე შემთხვევაა, როდესაც ღონისძიება ცოცხალ დიზაინერს ეძღვნება. მანამდე მსგავსი პატივი მხოლოდ Yves Saint Laurent-ს (1983 წელს) და Rei Kawakubo-ს (2017 წელს) ხვდათ წილად.

გარდა ამისა, 2011 წელს დიზაინერი Dior-ის კრეატიული დირექტორის პოზიციიდან გაათავისუფლეს მას შემდეგ, რაც პარიზის ერთ-ერთ ბარში ანტისემიტური განცხადებები გააკეთა.

ინციდენტს სასამართლო პროცესი მოჰყვა და დიზაინერი რამდენიმე წლით მოდის ინდუსტრიას ჩამოშორდა.

2014 წელს გალიანომ კარიერის აღდგენა დაიწყო და Maison Margiela-ს კრეატიული დირექტორი გახდა. მისი ნამუშევრები კრიტიკოსებმა არაერთხელ შეაფასეს როგორც ინოვაციური და გამორჩეული.

Met Gala-ს გამოფენა სწორედ ამ რთულ მემკვიდრეობასაც შეეხება – როგორც მის შემოქმედებით გენიალურობას, ასევე იმ სკანდალს, რომელმაც დიზაინერის კარიერა შეცვალა.

„გამოფენა არ გაექცევა ჯონის წარსულის რთულ პერიოდს. ეს ყველაფერი მისი ისტორიის ნაწილია“, — განაცხადა ანა ვინტურმა.

როგორი იქნება Met Gala 2027-ის დრეს-კოდი?

ოფიციალური დრეს-კოდი ჯერ არ გამოქვეყნებულა, თუმცა ტრადიციულად ის გამოფენის თემას უკავშირდება.

ექსპერტები ვარაუდობენ, რომ 2027 წლის წითელ ხალიჩაზე ვიხილავთ გალიანოსთვის დამახასიათებელ ელემენტებს — მკვეთრ სილუეტებს, კორსეტებს, თეატრალურ ფორმებს, ისტორიული ეპოქებით შთაგონებულ კაბებსა და თამამ ვიზუალურ გადაწყვეტილებებს.