#OK! „დაიცავი ილიაუნი“-ს კამპანიით დიუშენის კუნთოვანი დისტროფიის მქონე ბავშვებისთვის 200 000 ლარი შეგროვდა

დიუშენის კუნთოვანი დისტროფიის მქონე ბავშვების დახმარების მიზნით სტუდენტური მოძრაობის „დაიცავი ილიაუნი“ მიერ სოციალურ ქსელებში დაწყებული კამპანიის ფარგლებში უკვე 200 000 ლარზე მეტი შეგროვდა, ხოლო თავდაპირველად დასახული 100 000-ლარიანი მიზანი მხოლოდ 39 საათში შესრულდა.

„დაიცავი ილიაუნი“-ს ინიციატივა დიუშენის კუნთოვანი დისტროფიის მქონე ბავშვების ყოველდღიური საჭიროებების დასაფინანსებლად დაიწყო. მიზანი იყო ისეთი აუცილებელი დახმარების უზრუნველყოფა, როგორიცაა სასუნთქი აპარატები, მედიკამენტები, ეტლები და სარეაბილიტაციო მომსახურება. მოძრაობის წარმომადგენლები აცხადებდნენ, რომ კამპანიის მთავარი იდეა არის ყველასთვის ხელმისაწვდომი ჩართულობა – „ერთი ლარის კამპანია“, სადაც ნებისმიერი ადამიანი შეუძლია წვლილის შეტანა.

კამპანია სოციალური ქსელების უწყვეტ ლაივ–რეჟიმში მიმდინარეობდა, რაც ინიციატივის ერთ–ერთ მთავარ მექანიზმად იქცა. სწორედ ამ ფორმატმა უზრუნველყო მუდმივი ინფორმირება და საზოგადოების აქტიური ჩართულობა.

პირველ ეტაპზე 30 000 ლარი შეგროვდა, თუმცა პროცესმა სწრაფად მოიპოვა მასშტაბი და საბოლოოდ 100 000 ლარიანი მიზანი 39 საათში შესრულდა. მოძრაობის განცხადებით, ლაივი გაგრძელდება მანამ, სანამ ჩარიცხვები გაგრძელდება და საზოგადოების ინტერესი არ შემცირდება.

„უღრმესი მადლობა ყველას ჩართულობისა და აქტიურობისთვის. რადგან ასე მალე შეგროვდა ეს ოდენობა, ლაივი გაგრძელდება მანამ, სანამ თქვენ განაგრძობთ ჩარიცხვას. ძალა ერთობაშია!“ – ნათქვამია მოძრაობის განცხადებაში.

ორგანიზატორები ხაზს უსვამენ, რომ კამპანიის წარმატება მხოლოდ ფინანსური შედეგი არ არის – ეს არის ერთიანი სოლიდარობის მაგალითი, რომელმაც აჩვენა, რამდენად სწრაფად შეუძლია საზოგადოებას გაერთიანება კრიტიკულ საჭიროებებზე რეაგირებისას.

დიუშენის კუნთოვანი დისტროფია არის გენეტიკური დაავადება, რომელიც იწვევს კუნთების თანდათანობით დასუსტებასა და დაშლას. ხშირად პირველი ნიშნები 2–5 წლის ასაკში ჩნდება, შემდგომში კი იწვევს კუნთების დასუსტებას. ამ გენეტიკური დაავადების მქონე ადამიანების სიცოცხლის ხანგრძლივობა საშუალოდ 20 წლამდეა, თუმცა, თანამედროვე მედიკამენტების და მკურნალობის პირობებში, სიცოცხლის ხანგრძლივობა 30-40 წელს აღწევს.

შეგახსენებთ, რომ საქართველოში დიუშენის კუნთოვანი დისტროფიის მქონე 100-მდე ბავშვი ცხოვრობს მათი მშობლები კი ორ წელზე მეტია, რაც ჯანდაცვის სამინისტროს მათი სიცოცხლის გადასარჩენად მედიკამენტების შემოტანას სთხოვენ.