okmagazine ცხოვრების სტილი 
ზოგჯერ ერთი გაბედული გადაწყვეტილება საკმარისია, რომ ოცნებისკენ მიმავალი გზა დაიწყოს. სწორედ ასე აღმოჩნდა კინოსა და მოდის სამყაროში 12 წლის ნაზრინ აბდულლაევა, რომელიც უკვე საერთაშორისო პროექტებისთვის ემზადება და საკუთარ მიზნებს ნაბიჯ-ნაბიჯ უახლოვდება. ცოტა ხნის წინ მან წარმატებით გაიარა Netflix-ის პროექტის ქასთინგი, წინ კი თურქეთში მნიშვნელოვანი გადაღებები ელოდება. სწავლა, მსახიობობა, მოდელობა და მუდმივი განვითარება მისი ყოველდღიურობის ნაწილია. OK!-სთან ინტერვიუში ნაზრინი საკუთარ პირველ წარმატებებზე, ახალ შესაძლებლობებსა და დიდ ოცნებაზე გვესაუბრება.
როგორ გაჩნდა შენს ცხოვრებაში მსახიობობა და მოდელობა? რა იყო ის, რამაც ამ სფეროების მიმართ ინტერესი გაგიჩინა?
სიმართლე რომ გითხრათ, ყველაფერი სრულიად მოულოდნელად დაიწყო. არასდროს მქონია კონკრეტული გეგმა, რომ მსახიობი ან მოდელი გავმხდარიყავი. ერთ დღეს უბრალოდ გადავწყვიტე, საკუთარი შესაძლებლობები მეცადა და ქასთინგში მივიღე მონაწილეობა. ამის შემდეგ ახალი შესაძლებლობები გამოჩნდა და მსახიობობასა და მოდელობაში განვითარება დავიწყე. ახლა ძალიან მომწონს ამ სფეროში ზრდა და ახალი გამოცდილების მიღება.
სწავლა, რეპეტიციები, გადაღებები და სხვა აქტივობები – როგორ ახერხებ ყველაფრის ერთმანეთთან შეთავსებას?
ზოგჯერ ეს მარტივი არ არის, რადგან ჩემთვის სწავლა ყოველთვის პირველ ადგილზე დგას. ყველაფერს წინასწარ ვგეგმავ და თუ ვიცი, რომ გადაღებები ან რეპეტიციები მელის, დავალებებსაც ადრე ვასრულებ. ხანდახან დასვენებაზე ან გართობაზეც მიწევს უარის თქმა, მაგრამ ვიცი, რომ ეს ჩემი გზის ნაწილია. ძალიან მიყვარს ის, რასაც ვაკეთებ, ამიტომ ყველაფრის მოსწრებას ვცდილობ.
ცოტა ხნის წინ Netflix-ის პროექტის ქასთინგი წარმატებით გაიარე. როგორ გაიგე ეს სასიხარულო ამბავი და რა იყო პირველი ემოცია, რომელიც მაშინ განიცადე?
როდესაც მითხრეს, რომ ქასთინგი წარმატებით გავიარე, თავიდან ვერც კი დავიჯერე. რამდენჯერმე გადავამოწმე, რადგან მეგონა, რომ ეს სიზმარი იყო. შემდეგ ერთდროულად სიხარულმა, ბედნიერებამ და სასიამოვნო ღელვამ მომიცვა. ეს ჩემს ცხოვრებაში ერთ-ერთი ყველაზე დასამახსოვრებელი მომენტი იყო. ძალიან მადლიერი ვარ ყველასი, ვინც ჩემი ირწმუნა და ვაცნობიერებ, რომ ეს მხოლოდ დიდი გზის დასაწყისია. სწორედ მაშინ მივხვდი, რომ ზოგჯერ ყველაზე დიდი ცვლილებები ერთი გადაწყვეტილებით იწყება – უბრალოდ, სცადო.
ახლა თურქეთში მნიშვნელოვან გადაღებებზე მიემგზავრები. რას ნიშნავს შენთვის ეს შესაძლებლობა და რას ელოდები ამ გამოცდილებისგან?
ჩემთვის ეს ძალიან დიდი შესაძლებლობა და ახალი ეტაპია. ცოტას ვღელავ, რადგან საერთაშორისო დონის გადაღებები დიდ პასუხისმგებლობასთან არის დაკავშირებული, თუმცა ეს სასიამოვნო მღელვარებაა, რომელიც კიდევ უფრო მეტ მოტივაციას მაძლევს. ყველაზე მეტად პროფესიონალ გუნდთან მუშაობას, ახალი გამოცდილების მიღებასა და საკუთარი შესაძლებლობების განვითარებას ველოდები. მინდა თითოეული მომენტით ვისარგებლო და საკუთარი თავი ღირსეულად წარმოვაჩინო.
ოთხ ენასთან შეხება და საერთაშორისო გარემოში სწავლა რამდენად გეხმარება მსახიობობის გზაზე?
თავისუფლად ვფლობ ინგლისურ და რუსულ ენებს, ასევე ვიცი ესპანური და აზერბაიჯანული, ამჟამად კი ქართულსაც ვსწავლობ. ვფიქრობ, მსახიობისთვის უცხო ენების ცოდნა დიდი უპირატესობაა, რადგან სხვადასხვა ქვეყნის ადამიანებთან თავისუფლად ურთიერთობის შესაძლებლობას გაძლევს. ძალიან მიყვარს სხვადასხვა კულტურის გაცნობა და დარწმუნებული ვარ, ეს პერსონაჟების უკეთ გაგებაშიც მეხმარება.
დატვირთული გრაფიკის მიუხედავად, როგორ ატარებ თავისუფალ დროს? რა საქმიანობა განიჭებს ყველაზე დიდ სიამოვნებას?
მიუხედავად დატვირთული გრაფიკისა, ყოველთვის ვცდილობ დრო ჩემი საყვარელი საქმიანობისთვისაც გამოვყო. ჩემი ერთ-ერთი ყველაზე დიდი ჰობი LEGO-ს კოლექციონირებაა, განსაკუთრებით Architecture და Botanicals სერიების. მიყვარს მოდელების აწყობა და იმის ყურება, როგორ იქმნება უამრავი პატარა დეტალისგან რაღაც განსაკუთრებული. Architecture-ის სერია განსაკუთრებით მიზიდავს, რადგან მოგზაურობა და ახალი ქვეყნების აღმოჩენა ძალიან მიყვარს. თავისუფალ დროს კი ყველაზე მეტად ოჯახსა და მეგობრებთან ერთად ყოფნა მსიამოვნებს.
შენს ასაკში ბევრ ბავშვს ჯერ კიდევ არ აქვს გადაწყვეტილი, რა გზას გაჰყვეს, შენ კი უკვე მკაფიო მიზანი გაქვს. რა გაძლევს ყველაზე დიდ მოტივაციას, რომ ოცნებისკენ თავდაჯერებულად იარო?
როდესაც პირველად მსახიობობა ვცადე, მაშინვე მივხვდი, რამდენად ახლოს იყო ეს სფერო ჩემთან. ყველაზე დიდ მოტივაციას მაძლევს შესაძლებლობა, მუდმივად განვვითარდე და ყოველი ახალი პროექტით მეტი ვისწავლო. ვიცი, რომ წარმატება შრომის გარეშე არ მოდის, ამიტომ სირთულეების არ მეშინია. ყველაზე დიდი ძალა კი ჩემი ოჯახის მხარდაჭერაა.
როგორ წარმოგიდგენია საკუთარი თავი რამდენიმე წლის შემდეგ? რა არის ყველაზე დიდი ოცნება, რომლის ასრულებასაც სულმოუთქმელად ელოდები?
სიმართლე გითხრათ, შორეული გეგმების წინასწარ დასახვა არ მიყვარს. რამდენიმე წლის შემდეგ საკუთარ თავს უფრო გამოცდილ და თავდაჯერებულ ადამიანად წარმოვიდგენ. მჯერა, რომ ერთი გადაწყვეტილება – უბრალოდ სცადო – ძალიან ბევრს ცვლის, ამიტომ დარწმუნებული ვარ, წინ კიდევ ბევრი საინტერესო შესაძლებლობა მელის. ჩემი ყველაზე დიდი სურვილია, გავხდე მსახიობი, რომელსაც საინტერესო და რთულ როლებს ანდობენ, პროფესიის წყალობით ვიმოგზაურო და სხვადასხვა ქვეყანაში ვიმუშაო. ყველაზე მთავარი კი ის არის, რომ არასოდეს დავკარგო სიყვარული იმ საქმის მიმართ, რომელსაც დღეს ვაკეთებ. მინდა წლების შემდეგ ჩემს გზას ღიმილით გადავხედო და ვთქვა: „არ შემშინებია ახალი შესაძლებლობების, ბევრს ვშრომობდი და ჩემი ოცნებების ასრულება შევძელი“.
ტექსტი: მარიამ შულაია
ფოტო: სოფია პოდსადნიკოვა
