#OK! როგორ გპარავენ მონაცემებს ერთი შეტყობინებით — SMS ფიშინგის საფრთხე საქართველოში

ბოლო პერიოდში საქართველოში  SMS ფიშინგის შემთხვევები გახშირდა – თაღლითები ბანკების და საკურიერო სერვისების სახელით ყალბ შეტყობინებებს აგზავნიან: “თქვენი ანგარიში დაბლოკილია”, “გადახდა ვერ შესრულდა”, “დაადასტურეთ ბმულით” – თითქოს ჩვეულებრივი SMS-ია, მაგრამ ერთი კლიკიც საკმარისია იმისთვის, რომ თქვენი პირადი მონაცემები  თაღლითების ხელში აღმოჩნდეს.

რა არის SMS ფიშინგი?

SMS ფიშინგი, რომელსაც კიბერუსაფრთხოების სფეროში ხშირად „სმიშინგს“ (Smishing) უწოდებენ, კიბერთაღლითობის ერთ-ერთი ყველაზე გავრცელებული ფორმაა. მისი მიზანი მომხმარებლის მოტყუება და ისეთი კონფიდენციალური ინფორმაციის მოპოვებაა, როგორიცაა საბანკო ბარათის მონაცემები, ინტერნეტბანკის პაროლები, ერთჯერადი კოდები ან სხვა პერსონალური ინფორმაცია.

სქემა, როგორც წესი, ერთი შეხედვით უვნებელი ტექსტური შეტყობინებით იწყება. მომხმარებელი იღებს SMS-ს, რომელიც თითქოს სანდო ორგანიზაციისგანაა გამოგზავნილი — ბანკისგან, საკურიერო კომპანიისგან, სახელმწიფო უწყებისგან ან სხვა ცნობილი სერვისისგან. შეტყობინება ხშირად შეიცავს გადაუდებელ ან შემაშფოთებელ ინფორმაციას, მაგალითად, რომ ანგარიში დაიბლოკა, გადახდა ვერ შესრულდა, ამანათის მისაღებად დამატებითი მოქმედებაა საჭირო ან ანგარიშზე საეჭვო აქტივობა დაფიქსირდა.

მსგავს შეტყობინებებს, როგორც წესი, თან ახლავს ბმული, რომელიც მომხმარებელს ყალბ ვებგვერდზე ამისამართებს. ეს გვერდი ვიზუალურად ძალიან ჰგავს ნამდვილი ორგანიზაციის ოფიციალურ საიტს, რის გამოც ბევრ ადამიანს უჭირს მისი გარჩევა. თუ მომხმარებელი ასეთ გვერდზე საკუთარ მონაცემებს შეიყვანს, ინფორმაცია პირდაპირ თაღლითების ხელში ხვდება.