#OK! როცა პროფესია ზრუნვად იქცევა – ნათია გეთიას წარმატების ამბავი

ხანდახან პროფესიული არჩევანი ბავშვობაში მიღებული შთაბეჭდილებიდან იწყება. ერთი გადამწყვეტი მომენტიდან, როდესაც ხვდები, რომ ეს არის ის საქმე, რომელსაც უნდა გაჰყვე. ადამიანების დახმარების სურვილი, ზრუნვა სხეულსა და მენტალურ ჯანმრთელობაზე, გადამწყვეტი აღმოჩნდა ნათია გეთიასთვის, შეებიჯებინა მასაჟის სამყაროში. ნათია გვესაუბრა მასაჟის აქტუალობაზე. მისი თქმით, თანამედროვე ცხოვრების ტემპი, მუდმივი სტრესი და დაძაბულობა ყველაზე მეტად სხეულზე აისახება, სწორედ ამიტომ მასაჟი მხოლოდ მოდუნების საშუალება აღარ არის, ის ფიზიკური და ემოციური აღდგენის ერთ-ერთი აუცილებელი გზაა.

ნათია, რამ განაპირობა თქვენი პროფესიული არჩევანი?

საზოგადოებისთვის კარგად ნაცნობი ქალბატონის, მადონა კოიძის ბებია იყო მასაჟისტი. ბავშვობაში, როდესაც მისი მუშაობის პროცესს ვუყურებდი, სწორედ მაშინ დავინტერესდი მასაჟით – ჩემი პირველი შთაგონება იყო. უდიდესი მოტივაცია და მაგალითი აღმოჩნდა მისი პროფესიონალიზმი და საქმის სიყვარული. მისი დიდი დამსახურებაა ჩემი პროფესიული არჩევანი, დღესაც მადლიერებით ვიხსენებ იმ გზის დასაწყისს.

მასაჟი მხოლოდ ფიზიკური პროცედურაა თუ უფრო ფართო გავლენა აქვს ადამიანის მდგომარეობაზე?

მასაჟი ჩემთვის ბევრად მეტია, ვიდრე მხოლოდ ფიზიკური ზემოქმედება – ეს არის ადამიანის მთლიან მდგომარეობაზე ზრუნვა.

ის ეხმარება სხეულს მოდუნებაში, ტკივილის შემცირებასა და ენერგიის აღდგენაში, მაგრამ ამავე დროს მოქმედებს ემოციებსა და შინაგან განწყობაზე. ხშირად მასაჟის შემდეგ ადამიანი არა მხოლოდ უფრო მსუბუქად გრძნობს თავს სხეულში, არამედ შინაგანადაც მშვიდდება, თავისუფლდება დაძაბულობისა და სტრესისგან. ჩემთვის მასაჟი არის ჰარმონია, ბალანსი სხეულსა და სულს შორის.

ყველაზე ხშირად რა პრობლემებით მოგმართავენ ადამიანები? რომელი ტიპის მასაჟებია დღეს ყველაზე მოთხოვნადი?

ყველაზე მოთხოვნადია კისრისა და ზურგის დაჭიმულობის მოხსნა, რადგან დიდხანს ჯდომა, კომპიუტერი და ტელეფონი ამ ზონებს განსაკუთრებით ტვირთავს. ასევე ძალიან ხშირია წელის ტკივილი, შებერილობა და კუნთების სპაზმები.

გარდა ამისა, სულ უფრო იზრდება მოთხოვნა ანტიცელულიტურ და სხეულის მოდელირების პროცედურებზე, რადგან ადამიანები ცდილობენ ვიზუალის გაუმჯობესებას და ტონუსის აღდგენას. ასევე პოპულარულია ლიმფოდრენაჟი და დეტოქს-პროგრამები, რომლებიც ხელს უწყობს შეშუპების შემცირებას და ორგანიზმის განტვირთვას.

რამდენად აისახება სტრესი და ემოციური მდგომარეობა სხეულზე? და რა სიგნალებს გვაძლევს სხეული, როცა გადაღლილია ან დახმარება სჭირდება?

სხეული გვაძლევს მკაფიო სიგნალებს, როცა გადაღლილია ან დახმარება სჭირდება:

• მუდმივი დაძაბულობა კისერსა და მხრებში
• ხშირი თავის ტკივილები
• უძილობა ან ზედაპირული ძილი
• ენერგიის ნაკლებობა, სწრაფი დაღლა
• ფეხების სიმძიმე და შეშუპება
• გაღიზიანებადობა და შფოთვა

ყველაზე მნიშვნელოვანია, რომ ეს ნიშნები იგნორირებული არ იყოს. სხეული ყოველთვის გვეუბნება სიმართლეს, უბრალოდ, საჭიროა მოვუსმინოთ და დროულად მივცეთ მას დასვენება, ზრუნვა და აღდგენა.

როგორ იცვლება ადამიანის მდგომარეობა სწორი მასაჟის შემდეგ?

სწორი მასაჟის შემდეგ ცვლილებები ხშირად კიდევ უფრო ღრმად იგრძნობა, ვიდრე მხოლოდ ფიზიკური შვებაა.

ადამიანს უმცირდება შინაგანი დაძაბულობა და „სიმძიმის“ შეგრძნება, თითქოს სხეულთან ერთად გონებაც თავისუფლდება. უმჯობესდება განწყობა, მცირდება შფოთვა და ჩნდება ემოციური სიმშვიდე.

რას ურჩევდით ადამიანებს, რომლებიც საკუთარ ჯანმრთელობასა და სხეულზე ზრუნვას ხშირად ვერ ახერხებენ?

არ დაელოდონ „იდეალურ დროს“ საკუთარ თავზე ზრუნვის დასაწყებად, რადგან ის იშვიათად დგება. ბევრად ეფექტურია მცირე, მაგრამ რეგულარული ჩვევების შექმნა.

საკუთარ თავზე ზრუნვა არ ნიშნავს ეგოიზმს, ეს არის პასუხისმგებლობა საკუთარ ჯანმრთელობაზე, რათა ადამიანი იყოს უფრო ენერგიული, მშვიდი და პროდუქტიული.

სამომავლო გეგმები

მუდმივი განვითარება და წინსვლა. არ ვჩერდები ერთსა და იმავე პროგრამებზე, ვსწავლობ, ვნერგავ ახალ ტექნიკებს და ვაუმჯობესებ ჩემს მიდგომებს, რათა თითოეულ ადამიანს შევთავაზო უფრო ეფექტური და ინდივიდუალური შედეგი.

ჩემი მთავარი მიზანი კი უცვლელია – მუდმივი პროგრესი, ხარისხი და ადამიანების ჯანმრთელობისა და კეთილდღეობის გაუმჯობესება.

ტექსტი: სოფიო მალანია