აზერბაიჯანი ჩეჩნეთში AZAL-ის თვითმფრინავის ჩამოვარდნის შემდეგ რუსეთში ფრენებს აღადგენს

ამის შესახებ აზერბაიჯანის საგარეო საქმეთა მინისტრმა ჯეიჰუნ ბაირამოვმა რუსეთის საგარეო საქმეთა მინისტრ სერგეი ლავროვთან მოლაპარაკებების შემდეგ განაცხადა.

„სავარაუდოდ, რამდენიმე მიმართულებით პირდაპირი რეისები, რომლებიც 2024 წლის დეკემბერში ცნობილი ტრაგიკული ინციდენტის შემდეგ შეწყდა, მალე აღდგება“, - ბაირამოვის სიტყვებს სახელმწიფო საინფორმაციო სააგენტო TASS-ი ავრცელებს.

15 აპრილს აზერბაიჯანისა და რუსეთის საგარეო საქმეთა სამინისტროებმა ერთობლივი განცხადება გაავრცელეს 2024 წლის 25 დეკემბერს ყაზახეთში, აქტაუსთან, სამგზავრო თვითმფრინავის ჩამოვარდნასთან დაკავშირებით, რომლის შედეგადაც 38 ადამიანი დაიღუპა. განცხადებაში ნათქვამი იყო, რომ „მხარეებმა მიაღწიეს შედეგების შესაბამის გადაწყვეტას, მათ შორის კომპენსაციის საკითხს“.

Embraer 190 ბაქოდან გროზნოში მიფრინავდა, როდესაც რუსეთის ტერიტორიაზე ჰაერში დაზიანდა. თვითმფრინავმა მოახერხა კასპიის ზღვის თავზე გადაფრენა და აქტაუმდე ჩასვლა, სადაც დაშვებისას ჩამოვარდა. ჩამოვარდნის შედეგად 38 ადამიანი დაიღუპა, 29 კი გადარჩა.

თვითმფრინავის ჩამოვარდნიდან მეორე დღეს, Reuters-მა და Euronews-მა, აზერბაიჯანში არსებულ წყაროებზე დაყრდნობით, გაავრცელეს ინფორმაცია, რომ ჩამოვარდნის მიზეზი რუსული საჰაერო თავდაცვის სისტემის მიერ გასროლილი რაკეტა გახდა და პილოტებს საგანგებო დაშვების მოთხოვნის მიუხედავად, რუსეთის არცერთ აეროპორტში დაშვების უფლება არ მისცეს. თვითმფრინავს კასპიის ზღვის თავზე აქტაუს მიმართულებით ფრენის ბრძანება მიეცა, ხოლო მისი ნავიგაციის სისტემები არ მოქმედებდა.

აზერბაიჯანის პრეზიდენტმა ილჰამ ალიევმა ჩამოვარდნაში რუსეთი საჯაროდ დაადანაშაულა და მისი ხელმძღვანელობისგან „ჰუმანური ქცევა“ და კომპენსაცია მოითხოვა. რუსეთის პრეზიდენტმა ვლადიმირ პუტინმა ალიევს თვითმფრინავის ჩამოვარდნიდან ოთხი დღის შემდეგ ბოდიში მოუხადა, თუმცა მოსკოვმა ინციდენტზე პასუხისმგებლობა უარყო.