აზერბაიჯანის უსაფრთხოების საბჭოს მდივანი საქართველოს სტუმრობს

საქართველოს პრემიერ-მინისტრი ირაკლი კობახიძე 12 მარტს აზერბაიჯანის რესპუბლიკის უსაფრთხოების საბჭოს მდივანს, რამილ უსუბოვს შეხვდა. საქართველოში ოფიციალური ვიზიტის ფარგლებში უსუბოვი ასევე შეხვდა თავდაცვისა და შინაგან საქმეთა მინისტრებს. თავდაცვის მინისტრმა ირაკლი ჩიქოვანმა განაცხადა, რომ წელს საქართველო აზერბაიჯანი-თურქეთი-საქართველოს სამმხრივ თავდაცვის მინისტერიალს უმასპინძლებს.

„ჩვენს ქვეყნებს შორის ხანგრძლივი ურთიერთობა მყარ სტრატეგიულ პარტნიორობაში გადაიზარდა. ჩვენს ქვეყნებს შორის მნიშვნელოვანი ორმხრივი და რეგიონული საკითხების განხილვის საშუალება გვქონდა“, – დაწერა პრემიერ-მინისტრმა კობახიძემ „ტვიტერზე“ შეხვედრის შემდეგ და დასძინა, რომ საქართველო რეგიონში მშვიდობის ხელშეწყობის, სტაბილურობისა და თანამშრომლობის განმტკიცების ერთგული რჩება.

Productive meeting with Secretary of the Security Council of 🇦🇿, Ramil Usubov. The longstanding relationship between our countries has evolved into a robust strategic partnership. Had an opportunity to discuss crucial bilateral and regional matters between our nations. 🇬🇪 remains… pic.twitter.com/Gn4l92Jtgh

საქართველოს თავდაცვის სამინისტროს ინფორმაციით, 12 მარტს ჩიქოვანსა და უსუბოვს შორის გამართულ შეხვედრაზე, მხარეებმა თავდაცვის სფეროში თანამშრომლობის საკითხებსა და ორმხრივი სტრატეგიული თანამშრომლობის მნიშვნელობაზე ისაუბრეს  

საქართველოს თავდაცვის სამინისტროს ინფორმაციით, თავდაცვის მინისტრმა დაადასტურა საქართველოს მზაობა, საკუთარი წვლილი შეიტანოს სამხრეთ კავკასიაში მშვიდობისა და სტაბილურობის დამყარების პროცესში. შეხვედრაზე ყურადღება გამახვილდა აზერბაიჯანი-თურქეთი-საქართველოს სამმხრივი თანამშრომლობის ფორმატის მნიშვნელობაზე.

ვიზიტის ფარგლებში აზერბაიჯანის უსაფრთხოების საბჭოს მდივანი შინაგან საქმეთა მინისტრს ვახტანგ გომელაურს შეხვდა. საქართველოს შინაგან საქმეთა სამინისტროს ინფორმაციით, მხარეებმა ორი ქვეყნის შესაბამის სტრუქტურებს შორის უსაფრთხოების სფეროში თანამშრომლობის გაღრმავების მნიშვნელობაზე ისაუბრეს. საუბარი ასევე შეეხო რეგიონში მიმდინარე მოვლენებსა და უსაფრთხოების სფეროში არსებულ აქტუალურ საკითხებს.

ვახტანგ გომელაურმა აზერბაიჯანელ სტუმარს მადლობა გადაუხადა „ნაყოფიერი თანამშრომლობისთვის“ და იმედი გამოთქვა, რომ „პარტნიორული ურთიერთობები მომავალშიც აქტიურად გაგრძელდება და გაღრმავდება სხვადასხვა მიმართულებით“.

ასევე წაიკითხეთ:

• 11/12/2023 – საქართველოს პარლამენტის თავმჯდომარე აზერბაიჯანის პრეზიდენტს შეხვდა
• 28/11/2023 – აზერბაიჯანი-საქართველო-თურქეთის თავდაცვის მინისტერიალი

This post is also available in: English (ინგლისური)