არ ვაღიარებთ პარლამენტისა და მთავრობის ლეგიტიმაციას - ესტონეთის პარლამენტის განცხადება საქართველოზე

ქართველი ხალხის მხარდამჭერი განცხადება ესტონეთის პარლამენტის 49 წევრმა წარადგინა. მას პარლამენტის 59-მა წევრმა დაუჭირა მხარი 9-ის წინააღმდეგ.

"ბოლო ათწლეულების განმავლობაში ესტონეთი მზარდი შეშფოთებით ადევნებდა თვალს რუსეთის გავლენის ქმედებებს ქართული საზოგადოების პოლარიზაციისა და საქართველოში დემოკრატიულ არჩევნებში ჩარევის კუთხით. საქართველოს საპარლამენტო არჩევნების შედეგები, რომელიც გასული წლის ოქტომბერში ძალადობისა და დაშინების გარემოში ჩატარდა, არ გამოხატავს ქართველი ხალხის თავისუფალ ნებას", - ნათქვამია განცხადებაში.

მასში, ასევე საუბარია იმაზე, რომ "ქართული ოცნება", რომელიც რუსეთის მხარდაჭერით სარგებლობს, არჩევნების გაყალბებულ შედეგებს იყენებს სახელმწიფო ინსტიტუტებზე სრული კონტროლის მისაღწევად და ოპოზიციისა და სამოქალაქო საზოგადოების რეპრესებისთვის.

"ესტონეთის პარლამენტი უარს ამბობს აღიაროს პარლამენტისა და მთავრობის ლეგიტიმაცია, რომელიც დაშინებისა და გაყალბების გარემოში ჩატარებული საპარლამენტო არჩევნების შედეგად ჩამოყალიბდა. ასევე არ აღიარებს დანიშნული პრეზიდენტის ლეგიტიმაციას.

სანაცვლოდ, იგი სალომე ზურაბიშვილს ლეგიტიმურ პრეზიდენტად აღიარებს და მხარს უჭერს მის ძალისხმევას ქვეყანაში კონსტიტუციური კრიზისის დასასრულებლად.

ესტონეთის პარლამენტი მხარს უჭერს საქართველოში დემოკრატიულ ძალებს, რომლებიც ახალი არჩევნების ჩატარებას ითხოვენ, რაც გარდაუვალია საკონსტიტუციო კრიზისის დასაძლევად და დემოკრატიის აღსადგენად.

ასევე გმობს მშვიდობიანი დემონსტრანტების მიმართ სასტიკ რეპრესიებს და მოუწოდებს შეწყვიტოს მათი დევნა და ძალადობა. აგრეთვე, მოუწოდებს გაათავისუფლოს ყველა პოლიტიკური პატიმარი.

ესტონეთის პარლამენტი, ასევე მოუწოდებს სხვა ეროვნულ პარლამენტებს, დაგმოს საქართველოში მმართველი რეჟიმის ძალადობრივი ქმედებები.

ისინი, ასევე მოუწოდებენ ევროკომისიას და ევროკავშირის წევრ ქვეყნებს, დააწესონ სანქციები ქართველ პოლიტიკოსებსა და ოფიციალურ პირებზე, რომლებიც მონაწილეობენ მშვიდობიანი საპროტესტო აქციების ძალადობრივ რეპრესიებში და საქართველოს სამოქალაქო საზოგადოების წარმომადგენლების დევნაში.

პარლამენტი, ასევე მოუწოდებს მათ, მკაცრად შეზღუდონ კომუნიკაცია საქართველოს არალეგიტიმური ხელისუფლების ინსტიტუტებთან, სანამ არ ჩატარდება თავისუფალი და სამართლიანი არჩევნები, და მხარი დაუჭიროს საქართველოს სამოქალაქო საზოგადოების და ჯერ კიდევ გადარჩენილი თავისუფალი მედიის წარმომადგენლებს, რომლებიც აგრძელებენ მუშაობას თავისუფალი საზოგადოების სახელით, მიუხედავად დაშინებისა და დევნისა.

ესტონეთის პარლამენტი სოლიდარობას უცხადებს ქართველ ერს, რომელიც იცავს ადამიანის უფლებებს, კონსტიტუციას, დემოკრატიას და საქართველოს მომავალს ევროკავშირში", - ნათქვამია განცხადებაში.