“არა, ამას ვერ ვიტყვით, მოსახლეობამ იცის რომ პირველადი ჯანდაცვის სისტემა გამართულიაო…” – რა უთხრა მინისტრმა ზაზა წერეთელს

ნორვეგიის სამეფოს ჯანდაცვის სამინისტროს უფროსი მრჩეველი ზაზა წერეთელი:

რამოდენიმე წლის წინ, კოვიდამდე, ერთ „წარმატებულ“ ჯანდაცვის მინისტრის მოადგილესთან მქონდა შეხვედრა საქართველოში. პირველად ჯანდაცვაზე იყო საუბარი და იქნებ ნორვეგიის მთავრობა დაგვეხმაროს ამ სისტემის რეფორმირებაშიო. ვისაუბრეთ პირველად ჯანდაცვაზე და ვუთხარი რომ იმისათის რომ ნორვეგია ან სხვა ქვეყანა დაგვხმარებოდა საჭირო იყო რეალური სურათის აღწერა და ამ სიტუაციისთის უნდა დაგვერქვა პირველად ჯანდაცვის სისტემის შექმნა და არა რეფორმირება, რამეთუ სისტემა არ არსებობდა და არარსებულის რეფორმირება შეუძლებელია. არა, ამას ვერ ვიტყვით, პოლიტიკურად არ არის გამართლებელუ, ჩვენმა მოსახლეობამ იცის რომ პირველადი ჯანდაცვის სისტემა გამართულიაო…ჰოდა, ასე არსებობს ეს სისტემა იმის შემდეგ საქართველოში, ქალღალდზე და კონფერენციებზე

ჰოდა, მოვიდა თოვლი და ასეთი ილუზია წამებში იშლება. კატასტროფა ამინდში არ არის. სიცივე მოულოდნელი არ ყოფილა. თოვლი მძიმე იყო, მაგრამ პროგნოზირებადი. ნამდვილი კატასტროფაა ისაა რომ ინსტიტუტები გამოფიტულია და ფიქცია. სამინისტროს ანგარიშებში რეალობას არასოდეს ჰქონდა მნიშვნელობა; ეფექტურობა ფასდებოდა დოკუმენტების სისქეში და არა გადარჩენილ სიცოცხლეში. სახელმწიფო მანქანა მშვენივრად ფუნქციონირებს, იმ პირობით, რომ არასოდეს უცდიათ მისი გამოყენება

ხალხი ამას ინსტინქტურად გრძნობს. უმეტესობამ იცის რომ კრიზისის დროს სახელმწიფოსგან არაფრის მოლოდინი არ უნდა ჰქონოდე. ამიტომაც, მხოლოდ ერთმანეთს ეყრდნობიან. მოხალისეები გადაუდებელი დახმარების ალტერნატიული ჯგუფებს ქმნიან, ხალხი ერთმანეთს საკვებს და შეშას უზიარებს, ხოლო ვისაც გენერატორი აქვს, საკუთარ სახლს ფაქტობრივ თავშესაფრად გადააქცევს.

მოგვიანებით, როცა თოვლი დადნება, მთავრობა გამარჯვებას გამოაცხადებს. ანგარიშები დაიწერება. დიაგრამები აჩვენებს „წარმატებულ რეაგირებას“. დაზარალებულებს კი ამ ოფიციალურ ჩანაწერებში ადგილი არ ექნებათ. სამწუხაროდ როგორც ჩანს სახელმწიფოში რეალობას არსებობის უფლება არ აქვს.