არა მგონია, წალენჯიხაში მოეწონოთ, ტრუსიკიანმა კაცმა “ფერარით” რომ გაიშხუილა – არქიმანდრიტი დოროთე

არქიმანდრიტი დოროთე ყურაშვილი წალენჯიხაში კახა კალაძის ჩასვლაზე საკვირაო ქადაგების დროს ისაუბრა და ამასთან დაკავშირებით სახარებიდან გაიხსენა იგავი მდიდარ ჭაბუკზე, თუმცა დაამატა, რომ იმ ჭაბუკს სიმდიდრე ბოროტებით არ ჰქონდა მოპოვებული.

“იგავში მდიდარ ჭაბუკზე, ჭაბუკი მივიდა მაცხოვართან და ჰკითხა, რა ვქნა, რომ ვცხონდეო და მაცხოვარმა უთხრა, მცნებები შეასრულეო და შეახსენა ის მცნებები, რომელიც არის ადამიანთან ურთიერთობის ამსახველი: არა კაც ჰკლა, არა იმრუშო, არა იპარო, არა ცილი სწამო.

ჭაბუკმა უთხრა, ამას ჩემი სიყმაწვილიდან ვასრულებო. როგორც ჩანს, ამ ჭაბუკს ეს სიმდიდრე ბოროტებით არ ჰქონდა მოპოვებული, ამიტომ წერია მარკოზის სახარებაში, რომ უფალს შეუყვარდაო. მიუხედავად ამისა, ჭაბუკს, რომელსაც სიმდიდრე ბოროტებით არ ჰქონდა მოპოვებული, ქრისტემ რომ უთხრა, სიმდიდრე გაყიდეო, შეწუხდა და წავიდა, ახლა დავსვათ კითხვა, რამდენად შეწუხდება ის, ვისაც ბოროტებით აქვს მოპოვებული, ვისაც მკვლელობით აქვს მოპოვებული…

დღეს ჩვენ გვყავს ჩვენი ტრადიციების დამცველი მთავრობა. ჩამოვთვალოთ ის მცნებები, რომლებიც მაცხოვარმა დაუსახელა ჭაბუკს, რომელი არ დაურღვევიათ მათ, არა კაც კლა – მკვლელები არიან. არ იმრუშო – რა დღეში არიან, ყველამ იცით, ჩვენი ჭაბუკი მთავრები. არ იპარო – გაძარცვეს ქვეყანა. არ იცრუო – კი იცით, რამდენი ცილისმწამებელი პოლიციელი გვყავს, რომლებიც სრულიად უსამართლოდ ექცევიან ჩვენს ახალგაზრდებს, გმირ ბიჭებს, გმირ ქალებს, სახეში აფურთხებენ და მერე ისევ მას სჯიან და ციხეში უშვებენ.

ნიკო კვარაცხელია იყო ჩვენი მრევლი, რომელსაც ქართველმა ერმა მომავლის ბიჭი უწოდა. ქუჩაში დახვრიტეს და დახვრიტა არაკაცმა, რომელიც საერთოდ არ იცნობდა მას. დღემდე არაა გამოძიებული, ვინ დაუკვეთა…

ნიკო კვარაცხელია იყო წალენჯიხელი და გუშინ ნახეთ ალბათ წალენჯიხაში მილიონიანი მანქანით და ტრუსიკით ჩასული თბილისის მერი, რომელსაც არაფერი გაუკეთებია იმისთვის, რომ გამოეძიებინათ ვინ მოკლა ეს ბიჭი. მაგრამ ვერ გამოიძიებენ, იმიტომ რომ მათი დაკვეთაა. თავიანთ თავს ხომ არ დასჯიან.

მე ვფიქრობ, რომ ესენი იმდენად გადავიდნენ ზღვარს, იმდენად დააბრმავა ამ ბოროტებით მოპოვებულმა ფულმა და სიმდიდრემ, რომ ვერ ხვდებიან რას აკეთებენ, ფული აეფარათ სახეზე… წალენჯიხაში… ტრუსიკით… ფერარით… რომ გაიშხუილა, აბა ეს ადამიანი ხედავს საერთოდ? ეს რეკლამაა მათთვისაც? ამით ვინმეს თავს აწონებენ? უბრალოდ, დაბრმავებაა, მეტი არაფერი.

აი, ეს ბრმები, თურმე ტრადიციას იცავენ. მაგრამ წალენჯიხაში არა მგონია ტრუსიკიანი კაცი რომ მოეწონოთ და ტრადიციად ჩაუთვალონ ეს. ანუ სიბრმავის ასეთი სიდიდე არ მინახავს. ეს ბრმები, ბრმების წინამძღოლები ყველანი ორმოში ჩაცვივდებიან, რომელსაც ჯოჯოხეთი ჰქვია.

ღმერთმა უშველოს ჩვენს ქვეყანას, ჯანმრთელობა მისცეს ყველა პოლიტპატიმარს, მე მინდა მათ მხნეობა ვუსურვო, ვლოცულობ და დარწმუნებული ვარ, რომ ისინი გმირები გამოვლენ. ციხე ამათთვის იქნება საშინელება, ამ ბოროტებისთვის, თორემ მართალი ხალხისთვის ციხეც კი არაა საშინელი და ციხეშიც ამაყად სხედან, ასეთები არიან ჩვენი ბიჭები, რომლებიც ციხიდან გმირულ წერილებს წერენ.

ღმერთმა უშველოს ჩვენ საქართველოს და მალე გაათავისუფლოს ამათგან ჩვენი მრავალჭირნახული ქვეყანა” – თქვა არქიმანდრიტმა დოროთე ყურაშვილმა საკვირაო ქადაგებისას.