„ასავალ-დასავლის“ რესპონდენტის გარდაცვალების საქმეზე დეკანოიძე, დათუნაშვილი და ინაშვილი გამოკითხეს

ხატია დეკანოიძემ და თაზო დათუნაშვილმა მაგისტრატი მოსამართლის წინაშე ისურვეს გამოკითხვა, ირმა ინაშვილი კი დიღმის პოლიციის განყოფილებაში მივიდა.

„საქმე არის მარტივად - ეს არის პროპაგანდისტული ხმაური, რომელიც შექმნეს ამ საქმის გარშემო. მიზანი არის ღარიბაშვილის „გაშავება“ და მთელი კონგლომერატის შექმნა, რომ თურმე ღარიბაშვილი, დათუნაშვილი, გვარამია ერთი და იმავეს ლაპარაკობენ, ეს არ გამოუვათ“, - თქვა თაზო დათუნაშვილმა გამოკითხვის დასრულების შემდეგ.

ხატია დეკანოიძემ ჟურნალისტებს უთხრა, რომ დაინტერესდა, გამოკითხავენ თუ არა ირაკლი კობახიძესა და მამუკა მდინარაძეს, რომლებიც ირაკლი ღარიბაშვილმა იმავე წერილში დაასახელა, სადაც ლაზარე ჯორბენაძის გარდაცვალების ფაქტთან დაკავშირებით კითხვები დასვეს:

„ამ პროცესს არავითარი სამართლებრივი ღირებულება არ ჰქონდა, აბსურდი და წარმოუდგენელი კომიკურობა იყო“.

მათი გამოკითხვის შემდეგ პროკურორმა მედეა ცირამუამ თქვა, რომ „ვერცერთმა ხსენებულმა მოწმემ გამოძიებას ვერ მიაწოდა რაიმე სახის ინფორმაცია ლაზარე ჯორბენაძის თვითმკვლელობის ფაქტთან დაკავშირებით“.

ირმა ინაშვილიც მიიჩნევს, რომ გამომძიებლებმა უნდა გამოკითხონ კობახიძე და მდინარაძე. მისი თქმით, „ამაოდ იხარჯება სახელმწიფო რესურსი ჩვენი დაბარებით“:

„დღეიდან დაიწყება კითხვების დასმა ხელისუფლების და კონკრეტულად კობახიძის მიმართ. საერთოდ რა დოკუმენტზეა საუბარი? არსებობს თუ არა ასეთი დოკუმენტი, ან მსგავსი ტიპის სხვა დოკუმენტი? რა ხდება დავით გარეჯში?.. თუკი მსგავსი ტიპის დოკუმენტი არსებობს, მოხდეს მისი გასაჯაროება. იქ, სადაც ადრე გადავდიოდით გარეჯის ტერიტორიაზე, დღეს ვერ გადავდივართ“.

ამავე საქმეზე გამომძიებლებმა უკვე გამოკითხეს:

• ირაკლი ღარიბაშვილი - ყოფილი პრემიერ-მინისტრი;
• ნიკა გვარამია - „კოალიცია ცვლილებისთვის“ თანათავმჯდომარე;
• გია ხუხაშვილი - პოლიტოლოგი;
• გიორგი გიგაური - მწერალი.

რა ეწერა 1 აგვისტოს გავრცელებულ წერილში?

ამ წერილში ღარიბაშვილმა თქვა, რომ მას 12 თებერვალს ირაკლი კობახიძისა და მამუკა მდინარაძის დავალებით ციხეში შეუგზავნეს გაზეთ „ასავალ-დასავლის“ 2 თებერვლის ნომერი, რომელშიც ლაზარე ჯორბენაძესთან ინტერვიუა დაბეჭდილი. ჯორბენაძე ამტკიცებდა, რომ „დავით-გარეჯი გაყიდულია“ და მსგავსი დოკუმენტი საკუთარი თვალით აქვს ნანახი. ის ირაკლი კობახიძის საქმიანობას აკრიტიკებდა, ირაკლი ღარიბაშვილს კი დადებითად წარმოაჩენდა.

„გადმომცეს პრეტენზიული გზავნილი, რომელშიც გამოთქმული იყო აბსოლუტურად ცრუ აღქმაზე დაფუძნებული ეჭვი - ხომ არ ვიდექი მე ხსენებული სტატიის უკან... ახლა უკვე ჩემთვის სურათი ნათელია და პასუხი ყველა საკითხზე არის გაცემული თუ რატომ ჩამიწერეს წერილის პირველ პუნქტად, რომ „დიტო ჩუბინიძისნაირმა და ირმა ინაშვილისნაირმა მხარდამჭერებმა“ სერიოზული ეჭვები გააჩინეს და ძალიან დააზიანეს კობახიძე-მდინარაძის გუნდის ინტერესები“, - წერდა ღარიბაშვილი 1 აგვისტოს წერილში.

პროკურატურის გამოძიება

3 აგვისტოს პროკურატურამ განცხადება გაავრცელა, რომლის მიხედვითაც, „გამოკითხულია გარდაცვლილთან შემხებლობაში მყოფი პირები, მათ შორის, გარდაცვლილის ოჯახის წევრები და მეუღლე, რის საფუძველზეც, ამ ეტაპზე, უტყუარად დადასტურებულია თვითმკვლელობის ფაქტი“.

ამავე განცხადებით გაირკვა, რომ გამოკითხვაზე იბარებდნენ იმ ადამიანებს, რომლებმაც ლაზარე ჯორბენაძის გარდაცვალებაზე ისაუბრეს, მათ შორის ოპოზიციის ლიდერებს.

რა თქვეს ოპოზიციონერებმა?

• ხატია დეკანოიძე: „ყოფილი პრემიერ-მინისტრი, ივანიშვილის ყველაზე დიდი ხნის მსახური ხელს ადებს კობახიძე/მდინარაძეს, რომ კლავდნენ ან თვითმკვლელობამდე მიჰყავდათ“;
• ნიკა გვარამია: „ღარიბაშვილი თავის წერილში თვითმკვლელობით შენიღბულ მკვლელობებში რომ ამხელს კობახიძეს და მდინარაძეს, უინტერესო და დასაიგნორირებელი ვერ იქნება“;
• ირმა ინაშვილი: „რამდენადაც ჩემთვის ცნობილია, ლაზარე ჯორბენაძე აღმსარებელი და მაზიარებელი კაცი იყო და მისი თვითმკვლელობა იმთავითვე ეჭვს იწვევდა და უამრავ კითხვას ბადებდა“.

• 17 აგვისტოს „ქართული ოცნების“ ყოფილი ლიდერი, ყოფილი პრემიერ-მინისტრი ირაკლი ღარიბაშვილი, რომელმაც კორუფციული ბრალდება აღიარა და 5-წლიანი პატიმრობა მიესაჯა საპროცესო შეთანხმებით, გუნდს და ბიძინა ივანიშვილს ღიად დაუპირისპირდა;
• მისი თქმით, „ბიძინა ივანიშვილის დავალებით“ მას გაუგზავნეს წერილი, რომლითაც მისთვის უცნობი კორუფციული დანაშაულის „აღიარება“ შესთავაზეს, რადგან პოლიტიკაში დაბრუნების 1%-იანი „რისკი“ გადაეზღვიათ;
• 18 აგვისტოს გავრცელებულ წერილში მან თქვა, რომ წერილის გამგზავნი მამუკა მდინარაძე იყო - მდინარაძე სხვადასხვა დროს იკავებდა ვიცე-პრემიერის, მინისტრის, სუსის ხელმძღვანელის, საპარლამენტო ლიდერის თანამდებობებს;
• ამავე წერილში ღარიბაშვილმა თქვა, რომ ყველაფერი გააკეთა“ გუნდთან და ძვირფას ადამიანებთან „დაპირისპირების“ თავიდან ასაცილებლად. სწორედ ასე ახსნა მან მისთვის კორუფციის შესახებ წაყენებული ბრალის აღიარება, რის გამოც საპროცესო შეთანხმებით 5-წლიანი პატიმრობა აქვს მისჯილი;
• 24 აგვისტოს საქართველოს ყოფილ პრემიერ-მინისტრს ახალი, კორუფციის შესახებ ბრალდება პირადად წარუდგინეს, რაც 11-დან 15 წლამდე პატიმრობას ითვალისწინებს - გამოძიების თანახმად, თავდაცვის ყოფილი მინისტრის, კორუფციისთვის მსჯავრდადებული ჯუანშერ ბურჭულაძის ჩვენებით, მან გორის სამხედრო ჰოსპიტლის ტენდერში გამარჯვებული ბიზნესმენისგან, ზურაბ ტუკვაძისგან, ქრთამად მიღებული 1,5 მილიონი ლარიდან 750 000 ლარი რამდენიმე ეტაპად „ქეშად“ პირადად გადასცა ირაკლი ღარიბაშვილს;
• 27 აგვისტოს, მოულოდნელად, მამუკა მდინარაძემ ბრიფინგი გამართა და თანამდებობის დატოვებისა და პოლიტიკიდან წასვლის შესახებ განაცხადა. მისი თქმით, ამის შესახებ ესაუბრა პრემიერ ირაკლი ღარიბაშვილსა და პარტიის საპატიო თავმჯდომარეს, ბიძინა ივანიშვილს: „მირჩევნია გავიწიო“, „ჩემთვის ასე სჯობდა“;
• ამავე დღეს მან ჟურნალისტების კითხვის პასუხად უარყო ღარიბაშვილის გავრცელებული ინფორმაცია წერილის გაგზავნასთან დაკავშირებით: „არავისთვის არასდროს გამიგზავნია წერილი. პირდაპირ გეუბნებით, მსგავსი საკითხებით მე არასდროს ვყოფილვარ დაკავებული“;
• 31 აგვისტოს ცნობილი გახდა, რომ მამუკა მდინარაძის პოლიტიკიდან წასვლის შემდეგ ის სამინისტრო, რომელშიც მინისტრის თანამდებობას მანამდე იკავებდა, გაუქმდებოდა და ასევე აღარ შეიქმნებოდა უწყება, რომლის ხელმძღვანელიც უნდა გამხდარიყო.