netgazeti 
აფხაზეთის ე.წ. სახელმწიფო უსაფრთხოების სამსახურმა მოქალაქე რომან დარსალია დააკავა. უწყების განცხადებით, მიზეზი მის მიერ ინტერნეტში გავრცელებული განცხადებები გახდა, რომლებიც, უწყების შეფასებით, აფხაზ ხალხს შეურაცხყოფდა.
როგორც დე ფაქტო სამსახურის განცხადებაშია ნათქვამი, მათ ინტერნეტსივრცის მონიტორინგის შედეგად დაადგინეს, რომ დარსალიამ უკრაინელ ბლოგერთან პირდაპირ ეთერში საუბრისას გააკეთა „შეურაცხმყოფელი განცხადებები“ აფხაზი ხალხის მისამართით.
კერძოდ, უწყების ინფორმაციით, დარსალიამ გამოთქვა მოსაზრება, რომ აფხაზეთის ომის პერიოდში აფხაზებმა „ქართველების გენოციდი მოაწყვეს“.
დე ფაქტო სუს-ის ცნობით, ამჟამად დარსალიასთან დაკავშირებით „აუცილებელი შემოწმების ღონისძიებები“ მიმდინარეობს. უწყების განცხადებაში ასევე აღნიშნულია, რომ დარსალიამ ნათქვამი სიტყვებისთვის აფხაზ ხალხს ბოდიში მოუხადა.
„კავკაზსკი უზელის“-ის ინფორმაციით, დარსალიას განცხადებები 2025 წლის 28 სექტემბერს უკრაინელი ბლოგერის, ანდრეი პოპიკის YouTube-არხზე გამოქვეყნებულ ვიდეოში იყო. გამოცემა ასევე ავრცელებს დარსალიას ბოდიშის შინაარსს, სადაც ის ამბობს, რომ აფხაზი ხალხის გრძნობებს „გაუცნობიერებლად შეეხო“ და სინანულს გამოთქვამს.
ამავე ვიდეომიმართვაში დარსალია, გამოცემის ცნობით, აცხადებს, რომ აფხაზი ხალხის გენოციდი კი არა, თავად აფხაზი ხალხის გენოციდი მოხდა. იგი ასევე ბოდიშს იხდის რუსეთის ხელისუფლებისა და რუსეთის მოქალაქეების მისამართით გაკეთებული განცხადებების გამო.
