აშშ და სომხეთი ხელს მოაწერენ სტრატეგიული პარტნიორობის დოკუმენტს

რადიო თავისუფლების სომხური სამსახური სომხეთის საგარეო საქმეთა სამინისტროს პრესმდივანზე დაყრდნობით წერს, რომ მირზოიანი და ბლინკენი ხელს მოაწერენ დოკუმენტს სომხეთისა და აშშ-ის სტრატეგიული პარტნიორობის შესახებ.

სომხეთმა, რომელიც წლების განმავლობაში რუსეთის მოკავშირედ ითვლებოდა, ბოლო ხანს თანამშრომლობა გააძლიერა აშშ-სა და ევროკავშირთან.

სომხეთ-რუსეთის ურთიერთობები გაუარესდა მთიან ყარაბაღში განვითარებული მოვლენების ფონზე, რაც 2023 წლის სექტემბერში დასრულდა აზერბაიჯანის მიერ თავის შემადგენლობაში ამ რეგიონის დაბრუნებით.

აშშ-სა და ევროკავშირთან სომხეთის დაახლოების ფონზე მათთან ურთიერთობები უკიდურესად გაამწვავა „ქართული ოცნების" ხელისუფლებამ საქართველოში, რომელსაც ევროკავშირის წევრობის კანდიდატის სტატუსი აქვს და აშშ-თან სტრატეგიული პარტნიორობა წლების წინ დაამყარა.

2024 წელს, ე.წ. აგენტების კანონის და „ქართული ოცნების" წარმომადგენლების ანტიდასავლური, ყალბ ბრალდებებზე დაფუძნებული რიტორიკის გამო, შეერთებულმა შტატებმა საქართველოს ხელისუფლებას არაერთხელ მოუწოდა ევროპული და ევროატლანტიკური ინტეგრაციის გზაზე დაბრუნებისკენ, ნოემბერში კი საქართველოსთან სტრატეგიული პარტნიორობა შეაჩერა.

სახელმწიფო დეპარტამენტმა გადაწყვეტილება 2024 წლის 30 ნოემბერს გამოაცხადა მას შემდეგ, რაც ორი დღით ადრე „ქართული ოცნების" ხელისუფლებამ გადაწყვიტა, 2028 წლის ბოლომდე დღის წესრიგში არ დააყენოს ევროკავშირში გასაწევრიანებლად მოლაპარაკების გახსნის საკითხი, ამის გამო ქვეყანაში დაწყებული საპროტესტო აქციების მონაწილეთა წინააღმდეგ კი ძალის გამოყენება დაიწყო.

„ქართული ოცნების" გადაწყვეტილებამდე გაცილებით ადრე, ევროკავშირმა საქართველოში დემოკრატიის უკუსვლის გამო, თავად შეაჩერა ქვეყნის გაწევრების პროცესი.

შეერთებულმა შტატებმა „ქართული ოცნების", მათ შორის პარტიის საპატიო თავმჯდომარის, ბიძინა ივანიშვილის წინააღმდეგ სანქციებიც აამოქმედა.