აშშ-ის სახელმწიფო დეპარტამენტი „ქართულ ოცნებას“: დემოკრატიული მანდატის მოპოვება ვერ მოხდება მოწინააღმდეგეების ცენზურით ან ციხეში ჩასმით

აშშ-ის სახელმწიფო დეპარტამენტმა განაცხადა, რომ აგრძელებს საქართველოს მიმართ თავისი მიდგომის შეფასებას ამერიკის ინტერესების წინსვლისთვის. „აშშ-მა ნათლად დააფიქსირა ის ნაბიჯები, რომელთა გადადგმაც საქართველოს მთავრობას შეუძლია, რათა აჩვენოს, რომ სერიოზულად არის განწყობილი აშშ-თან ურთიერთობის გაუმჯობესებისთვის“, – ნათქვამია სახელმწიფო დეპარტამენტის წერილობით პასუხში, რომელიც www.globalnews.ge-ს მას შემდეგ გაეგზავნა, რაც მისმა კორესპონდენტმა სახელმწიფო დეპარტამენტის პრესსპიკერს, ტემი ბრუსს ბრიფინგზე ჰკითხა, თუ როგორია  საქართველოში არსებულ ვითარებასთან დაკავშირებით შეერთებული შტატების პოზიცია. აშშ-ის სახელმწიფო დეპარტამენტი „ქართული ოცნების“ ხელისუფლების ქმედებებს აფასებს როგორც „ანტი-დემოკრატიულს“ და ხელისუფლებას ოპონენტებზე ცენზურის დაწესებისა და მათი ციხეში ჩასმის გამო აკრიტიკებს.      

„რაც შეეხება „ქართული ოცნების” მთავრობის მიერ განხორციელებულ განგრძობით ანტიდემოკრატიულ ქმედებებს – როგორც ვიცე პრეზიდენტმა ვენსმა მიუნხენში აღნიშნა, დემოკრატიული მანდატის მოპოვება ვერ მოხდება მოწინააღმდეგეების ცენზურით ან ციხეში ჩასმით, ასევე ვერ მოიპოვებთ მას, ძირითადი ელექტორატის პოზიციის უგულვებელყოფით, თუ ვინ უნდა გახდეს ჩვენი საერთო საზოგადოების ნაწილი“, – ნათქვამია სახელმწიფო დეპარტამენტის წერილში.

ამავე წერილის თანახმად, „შეერთებული შტატები, 33 წლის განმავლობაში, საქართველოსა და ქართველი  ხალხის პარტნიორია და ამ ხნის განმავლობაში ძლიერი მხარდამჭერი საქართველოს დამოუკიდებლობის, სუვერენიტეტისა და ტერიტორიული მთლიანობის საკითხებში”.

სახელმწიფო დეპარტამენტის პასუხამდე ცოტა ხნით ადრე, აშშ-ის ელჩი რობინ დანიგანი 14 მარტს „ქართული ოცნების“ საგარეო საქმეთა მინისტრს მაკა ბოჭორიშვილს, ხოლო 1 აპრილს ეკონომიკისა და მდგრადი განვითარების მინისტრს ლევან დავითაშვილს შეხვდა. ეს ელჩის პირველი შეხვედრებია „ქართული ოცნების“ წარმომადგენლებთან 26 ოქტომბრის სადავო საპარლამენტო არჩევნების შემდეგ და ორმხრივი ურთიერთობების გაუარესების ფონზე. ბოჭორიშვილთან შეხვედრის შემდეგ, აშშ-ის საელჩომ ფეისბუქზე დაწერა, რომ ელჩმა დანიგანმა ბოჭორიშვილს „გააცნო პრეზიდენტ ტრამპისა და სახელმწიფო მდივან რუბიოს მთავარი პრიორიტეტები, ასევე, ის ნაბიჯები, რომელიც საქართველოს შეუძლია გადადგას, რათა აჩვენოს ამერიკის შეერთებულ შტატებთან ურთიერთობის გაუმჯობესებისადმი სერიოზული დამოკიდებულება“.

რაც შეეხება დავითაშვილთან შეხვედრას, ეკონომიკის სამინისტროს პრესრელიზის თანახმად, მხარეებმა ამერიკის შეერთებული შტატების ახალ ადმინისტრაციასთან თანამშრომლობის პერსპექტივები განიხილეს, მათ შორის ისეთ სფეროებში, როგორიცაა ეკონომიკა, ვაჭრობა, ინოვაციები, ლოგისტიკა, ენერგეტიკა და შუა დერეფნის განვითარება.

This post is also available in: English (ინგლისური)