ბადრა გუნბამ ოკუპირებული აფხაზეთის „საპრეზიდენტო არჩევნების” მეორე ტურში გაიმარჯვა

1 month ago 5

ოკუპირებულ აფხაზეთში ე.წ. საპრეზიდენტო არჩევნების მეორე ტური 1 მარტს გაიმართა, სადაც ე.წ. ცენტრალური საარჩევნო კომისიის მიერ გამოქვეყნებული წინასწარი შედეგებით, ბადრა გუნბამ ადგურ არძინბას მოუგო. გავრცელებული ინფორმაციით, გუნბა მოსკოვის ფავორიტი კანდიდატი იყო.

არჩევნების შემდეგ ღამით, გუნბამ თავის საარჩევნო შტაბთან შეკრებილ მხარდამჭერებს მიმართა და გამარჯვება გამოაცხადა. „ეს არ არის ბადრა გუნბას და ბესლან ბიგვავას გუნდის გამარჯვება. ეს უნდა იყოს აფხაზეთის ხალხის გამარჯვება“, – განაცხადა მან და დასძინა, რომ „აფხაზეთის მომავლისთვის ჩვენ ერთიანნი უნდა ვიყოთ“.

აფხაზეთის ცესკო-ს წინასწარი მონაცემების თანახმადაც:

ბადრა გუნბამ ხმების 54.73 (54 954 ხმა) მოიპოვა;
ადგურ არძინბამ კი ხმების 41.54 % (41 708 ხმა).

ოკუპირებული აფხაზეთის ე.წ. ცენტრალურმა საარჩევნო კომისიამ განაცხადა, რომ ამომრჩეველთა აქტივობამ თითქმის 70% შეადგინა. სულ ხმა 100 412 ამომრჩეველმა მისცა. “ცესკოს თავმჯდომარის” დმიტრი მარშანის თქმით, 2 065 ამომრჩეველმა “ყველას წინააღმდეგ” მისცა ხმა, ხოლო 1 687 ბიულეტენი ბათილად გამოცხადდა.

რუსეთის პრეზიდენტმა ვლადიმირ პუტინმა ბადრა გუნბას მისალოცი წერილი გაუგზავნა. „დარწმუნებული ვარ, რომ რუსეთსა და აფხაზეთს შორის მეგობრული, სამოკავშირეო ურთიერთობები კვლავაც გაძლიერდება ჩვენი მოძმე ხალხების საკეთილდღეოდ”, – ნათქვამია წერილში.

„შეიარაღებული თავდასხმა“ საარჩევნო უბანზე

„არჩევნების დღე“ ძალადობით დასრულდა. დაახლოებით 19:30 საათზე დაძაბულობამ პიკს მიაღწია მას შემდეგ, რაც გაგრის რაიონის ცანდრიფშის სკოლის მე-2 საარჩევნო უბანზე „შეიარაღებულ თავდასხმას“ საარჩევნო ყუთისა და საარჩევნო დოკუმენტების დაზიანება მოყვა, იტყობინება „აფსნიპრესი“ დე ფაქტო შინაგან საქმეთა სამინისტროს პრესსამსახურზე დაყრდნობით.

თავდამსხმელებმა მანქანებით მიმალვა სცადეს, თუმცა სამართალდამცველების მიერ მათი დევნის დროს „მიუსერის საგუშაგოზე“ სროლა მოხდა მას შემდეგ, რაც თავდამსხმელებმა, სავარაუდოდ, ცეცხლი გაუხსნეს სამართალდამცავებს. ინციდენტის შედეგად ორი მშვიდობიანი მოქალაქე დაშავდა, რომლებიც საავადმყოფოში გადაიყვანეს. რამდენიმე თავდამსხმელი დააკავეს.

რუსეთის საგამოძიებო კომიტეტმა სისხლის სამართლის საქმე რუსეთის სისხლის სამართლის კოდექსის რამდენიმე, მათ შორის ტერორიზმის მუხლით აღძრა, განაცხადა რუსეთის საგამოძიებო კომიტეტის ოფიციალურმა წარმომადგენელმა სვეტლანა პეტრენკომ.

ინციდენტების შემდეგ გუნბამ განაცხადა: „სამწუხაროდ, ეს არის გარკვეული პირების უპასუხისმგებლობა. იმედია ამას ტრაგედია არ მოყვება. ჩვენი ქვეყნის თითოეული ადამიანი, თითოეული მოქალაქე იმსახურებს თავისუფალ, დამოუკიდებელ და აყვავებულ სახელმწიფოში ცხოვრებას“.

აფხაზეთის დე ფაქტო პარლამენტმა ვადამდელი არჩევნები მას შემდეგ დანიშნა, რაც ასლან ბჟანიამ დე ფაქტო პრეზიდენტის პოსტი გასული წლის ნოემბერში, ოკუპირებულ რეგიონში მასობრივი საპროტესტო აქციების ფონზე დატოვა. ვინაიდან პირველ ტურში ვერც ერთმა კანდიდატმა ვერ გადალახა 50%-იანი ბარიერი, არჩევნების მეორე ტური დაინიშნა.

„ქართული ოცნების“ გამოხმაურება

შერიგებისა და სამოქალაქო თანასწორობის საკითხებში სახელმწიფო მინისტრის აპარატმა დაგმო აფხაზეთში „საპრეზიდენტო არჩევნების“ მეორე ტური და მას საქართველოს სუვერენიტეტისა და საერთაშორისოდ აღიარებულ საზღვრებში ტერიტორიული მთლიანობის „მორიგი უხეში დარღვევა“ უწოდა.

საერთაშორისო გამოხმაურება

ევროკავშირის პრესსამსახურმა აფხაზეთის ე.წ. არჩევნებზე კომენტარი გააკეთა და განაცხადა, რომ არ ცნობს იმ კონსტიტუციურ და სამართლებრივ ჩარჩოს, რომელშიც აფხაზთში ე.წ საპრეზიდენტო არჩევნები ჩატარდა. ევროკავშირმა ხაზი გაუსვა საქართველოს ტერიტორიული მთლიანობისა და სუვერენიტეტის მხარდაჭერას და გაიმეორა, რომ ბლოკი გააგრძელებს არაღიარებისა და ჩართულობის პოლიტიკას.

საერთაშორისო საზოგადოების უმეტესობა აფხაზეთსა და ცხინვალის რეგიონს რუსეთის მიერ ოკუპირებულ ტერიტორიებად მიიჩნევს და მათ დე ფაქტო ხელისუფლებასთან ნებისმიერ დიპლომატიურ ჩართულობას საქართველოს სუვერენიტეტისა და ტერიტორიული მთლიანობის დარღვევად აფასებს.

არჩევნების პირველი ტურის შემდეგ უკრაინამ და გაერთიანებულმა სამეფომ დაგმეს პროცესი და კიდევ ერთხელ დაადასტურეს, რომ არ აღიარებენ მის ლეგიტიმურობას.

ასევე წაიკითხეთ:

This post is also available in: English (ინგლისური) Русский (რუსული)

სრულად წაკითხვა