ბლინკენი ახლო აღმოსავლეთის ქვეყნებს სირიაში მშვიდობიანი პოლიტიკური გარდაქმნის მხარდაჭერისკენ მოუწოდებს

შეერთებული შტატების სახელმწიფო მდივანი ენტონი ბლინკენი აძლიერებს ძალისხმევას, რათა ახლო აღმოსავლეთის ქვეყნები სირიაში მშვიდობიანი პოლიტიკური გარდაქმნის მხარდასაჭერად გააერთიანოს.

თურქეთის პრეზიდენტ ერდოღანთან მოლაპარაკების შემდეგ, რომლითაც ის თურქეთთან კონსენსუსის მიღწევას ცდილობდა, რათა სირიის უფრო ფართო ქაოსში ჩაფლობა არ დაუშვან, შეერთებული შტატების სახელმწიფო მდივანი 13 დეკემბერს ქვეყნის საგარეო საქმეთა მინისტრს ხვდება.

ეს ბლინკენის მე-12 ვიზიტია ახლო აღმოსავლეთში მას შემდეგ, რაც ღაზაში ისრაელ-„ჰამასის“ ომი დაიწყო. თუმცა, სირიის პრეზიდენტ ბაშარ ალ ასადის გაძევების შემდეგ, ის რეგიონს პირველად ეწვია.

ბაიდენის ადმინისტრაციას კონკრეტულად აღელვებს ის საკითხი, რომ სირიაში ხელისუფლების ვაკუუმმა შეიძლება რეგიონში უკვე გამწვავებული დაძაბულობა გააძლიეროს და დაჯგუფება „ისლამურ სახელმწიფოს“ ტერიტორიის და გავლენის დაბრუნების პირობები შეუქმნას.