ბრიტანელმა მეცნიერმა საქართველოს მწერალთა სახლის ჯილდოს მიღებაზე უარი თქვა

ბრიტანელმა მეცნიერმა და ქართველოლოგმა დონალდ რეიფილდმა უარი თქვა საქართველოს მწერალთა სახლის  „მადლიერების ჯილდოს“ მიღებაზე და ამის მიზეზად ქვეყანაში არსებული პოლიტიკური კლიმატი და „ქართული ოცნების“ ქმედებები დაასახელა.

„ღრმად დამწუხრებული ვარ იმით, რაც საქართველოში ხდება და ვერ მივიღებ ვერანაირ საჩუქარს, რომელიც რაიმე გზით მმართველ პარტიასთან ასოცირდება“, – განაცხადა რეიფილდმა 11 მარტს ლონდონში საქართველოს კულტურის სამინისტროს, გაერთიანებულ სამეფოში საქართველოს საელჩოსა და საქართველოს მწერალთა სახლის მიერ ორგანიზებულ ღონისძიებაზე. მისი თქმით, იგი იმედოვნებს, რომ „მომავალი თაობა შეძლებს რაიმეს შეცვლას“ საქართველოში, თუმცა არ იცის როგორ.

83 წლის რეიფილდი ლონდონის დედოფალი მერის უნივერსიტეტის პროფესორი, რუსული და ქართული ლიტერატურის ექსპერტია. იგი ყურადღებით ადევნებდა თვალს საქართველოს ისტორიას და პოლიტიკურ მოვლენებს.

პრემია მისთვის საქართველოს მწერალთა სახლის დირექტორს ქეთევან დუმბაძეს უნდა გადაეცა. ამ უკანასკნელის დანიშვნას კულტურის მაშინდელი მინისტრის თეა წულუკიანის მიერ 2023 წელს მწვავე კრიტიკა მოყვა. დუმბაძე „ქართული ოცნების“ ყოფილი დეპუტატია და ერთ-ერთი მათგანია, ვინც უცხოელი აგენტების შესახებ სადავო კანონს მხარი დაუჭირა. მის დანიშვნას მწერალთა სახლის მიმართ 100-მდე ქართველი მწერლის, მთარგმნელისა და გამომცემლის ბოიკოტი მოყვა.

ასევე წაიკითხეთ:

• 04/09/2023 – ლიტერატურის სფეროს წარმომადგენლები კულტურის სამინისტროსა და მწერალთა სახლს ბოიკოტს უცხადებენ

This post is also available in: English (ინგლისური) Русский (რუსული)