radiotavisupleba ახალი ამბები 
უკრაინის პრეზიდენტმა, ვოლოდიმირ ზელენსკიმ 16 ოქტომბერს მონაწილეობა მიიღო ბრიუსელში მიმდინარე ევროკავშირის სამიტის პლენარულ სხდომაში. სამიტის ერთ-ერთი მთავარი საკითხი იყო უკრაინის მხარდაჭერა, შეხვედრა გაიმართა კიევსა და ვაშინგტონს შორის კავშირების დაძაბვის ფონზე.
სხდომის შემდეგ ზელენსკიმ ჟურნალისტებთან საუბარში ევროკავშირის წევრ სახელმწიფოებს კიდევ ერთხელ მოუწოდა უკრაინას მიაწოდონ Patriot-ის ტიპის ანტისაჰაერო სისტემების რაკეტები - რომლებიც, ზელენსკის თქმით, ევროკავშირის არსენალშია. ზელენსკიმ ასევე აღნიშნა, რომ კორპორაცია SpaceX-ის კუთვნილი კავშირების მუშაობა უკრაინაში აღდგენის პროცესშია, თუმცა შეზღუდვები სრულად მოხსნილი არ არის. დეტალები ზელენსკის არ დაუკონკრეტებია.
უკრაინელი მეომრების მიერ გამოყენებული Starshield-ის სისტემის მუშაობაში გაჩენილი შეზღუდვების შესახებ ინფორმაციის გავრცელება დაიწყო კვირის დასაწყისში, აშშ-სთან ურთიერთობის დაძაბვის ფონზე. ეს სისტემა ეფუძნება კორპორაცია SpaceX-ის კუთვნილი Starlink-ის კავშირგაბმულობას. კორპორაციის მფლობელი, ილონ მასკი - რომელიც ზელენსკის კრიტიკოსია - აცხადებს, რომ შეზღუდვებთან კავშირი არ აქვს, რადგან Starshield-ის სამხედროები მართავენ.
არც პენტაგონს და არც თეთრ სახლს არ უთქვამთ, რომ კავშირი აქვთ შეზღუდვების შემოღებასთან უკრაინაში ამ სისტემის მუშაობაში.
სააგენტო Reuters წყაროებზე დაყრდნობით იუწყება, რომ უკრაინაში Starshield-ის მუშაობის შენელების განკარგულება თეთრი სახლიდან გაიცა, თუმცა არა პირადად პრეზიდენტ დონალდ ტრამპისგან. ეს ინფორმაცია დადასტურებული არ არის.
ზელენსკიმ კიდევ ერთხელ თქვა, რომ უკრაინა ეწინააღმდეგება აშშ-რუსეთის "დიზელის გარიგებას", რადგან ხედავს საფრთხეს, რომ ამას მოჰყვება სხვა შეთანხმებები და ბოლოს რუსეთისთვის სანქციების მოხსნა.
