გაერთიანებულმა სამეფომ ქართველ მოსამართლეებს „სერიოზულ კორუფციაში“ ჩართულობის გამო სანქციები დაუწესა

გაერთიანებული სამეფოს საგარეო საქმეთა, თანამეგობრობისა და განვითარების ოფისმა 2 აპრილს სანქციები დაუწესა ორ ქართველ მოსამართლეს – მიხეილ ჩინჩალაძეს, თბილისის სააპელაციო სასამართლოს თავმჯდომარეს, და ლევან მურუსიძეს, იმავე სასამართლოს მოსამართლეს. ორივე მათგანი საქართველოს იუსტიციის უმაღლესი საბჭოს, შესაბამისად, ყოფილი და მოქმედი წევრები არიან. დიდმა ბრიტანეთმა ამის მიზეზად სერიოზულ კორუფციაში მათი მონაწილეობა დაასახელა, რაც სასამართლო დანიშვნებზე ზეგავლენის მოხდენას და მმართველი პარტიის სასარგებლოდ გადაწყვეტილებების მიღებას ისახავდა მიზნად.

ორივე მოსამართლეს ახლა გაერთიანებული სამეფოს 2021 წლის გლობალური ანტიკორუფციული სანქციების რეგულაციების შესაბამისად, აქტივების გაყინვა ემუქრება, რაც იმას ნიშნავს, რომ ბრიტანეთის იურისდიქციის ფარგლებში არსებული მათი ნებისმიერი აქტივი ან ფინანსური ანგარიში გაიყინება.

დიდი ბრიტანეთის მთავრობას აქვს „გონივრული ეჭვი“, რომ ჩინჩალაძე და მურუსიძე „სერიოზულ კორუფციაში“ მონაწილეობდნენ საკუთარი თანამდებობების არასათანადოდ გამოყენების გზით, რათა „ქართული ოცნების“ ინტერესების შესაბამისი გადაწყვეტილებები მიეღოთ და დანიშვნები განეხორციელებინათ.

მიხაილ ჩინჩალაძესთან დაკავშირებით, დოკუმენტში წერია, რომ მან ფინანსური სარგებელი და უვადო მოსამართლედ დანიშვნა მიიღო მას შემდეგ, რაც ხელისუფლებისთვის ხელსაყრელი შედეგების მისაღებად თავისი, როგორც სასამართლოს თავმჯდომარის გავლენა გამოიყენა.  

ანალოგიურად, მურუსიძეს ბრალად ედება იუსტიციის უმაღლეს საბჭოში მუშაობისას არასათანადო შეღავათების მიღება, მათ შორის „ფინანსური უპირატესობის მიღება საჯარო ფუნქციების არასათანადოდ შესრულებისთვის“ და თბილისის სააპელაციო სასამართლოში უვადო დანიშვნა. მანაც გამოიყენა თავისი თანამდებობა „ქართული ოცნებისთვის“ ხელსაყრელი გადაწყვეტილებების მისაღებად, ნათქვამია დოკუმენტში.

ორივე მოსამართლე მანამდეც გახდა საერთაშორისო სანქციების სამიზნე. 2023 წლის აპრილში აშშ-ის სახელმწიფო მდივანმა ენტონი ბლინკენმა სანქციები დაუწესა 4 ქართველ მოსამართლეს – მიხეილ ჩინჩალაძეს, ლევან მურუსიძეს, ირაკლი შენგელიასა და ვალერიან ცერცვაძეს – ვიზის აკრძალვის შესახებ 7031(c) წესის საფუძველზე, „მნიშვნელოვან კორუფციულ საქმიანობაში მათი ჩართულობის გამო“. ბლინკენმა მაშინ განაცხადა, რომ დასახელებულმა მოსამართლეებმა, „ბოროტად გამოიყენეს მათი თანამდებობა როგორც სასამართლოს თავმჯდომარეებმა და იუსტიციის უმაღლესი საბჭოს წევრებმა, რითაც ზიანი მიაყენეს სამართლის უზენაესობასა და საზოგადოების ნდობას საქართველოს სასამართლო სისტემის მიმართ“.  

2024 წლის დეკემბერში, უკრაინამ სანქციები დაუწესა საქართველოს ოფიციალურ პირებს, მათ შორის ჩინჩალაძესა და მურუსიძეს, რომლებიც „ყიდიან საქართველოსა და მისი ხალხის ინტერესებს“.

This post is also available in: English (ინგლისური)