გავრცელებული ინფორმაციით, MEGOBARI აქტის განხილვა აშშ-ის სენატში მომდევნო კვირას დაიწყება

აშშ-ის სენატში MEGOBARI-ს აქტის განხილვა იწყება. ორპარტიული კანონპროექტი ადამიანის უფლებათა დარღვევისა და დემოკრატიის შელახვისთვის „ქართული ოცნების“ ხელისუფლების წინააღმდეგ სანქციებს ითვალისწინებს და მისი განხილვა სენატის საგარეო საქმეთა კომიტეტში „მომდევნო კვირის დასაწყისში“ დაიწყება, ამის თაობაზე კონგრესის წყაროებზე დაყრდნობით ვაშინგტონის კორესპონდენტი ალექს რაუფოღლუ იტყობინება.  

„ამავდროულად, MEGOBARI აქტის კონგრესში შეტანილი ვერსია, რომელიც ჯო უილსონმა და კონგრესმენმა სტივ კოენმა წლის დასაწყისში წარადგინეს, ყოველდღიურად სულ უფრო მეტ მხარდაჭერას იძენს“, – წერს რაუფოღლუ სოციალურ მედიაში.

მან ასევე დასძინა, რომ კანონპროექტმა მიმდინარე კვირის მდგომარეობით უკვე 18 თანასპონსორი შეიძინა.

კანონპროექტი პირველად გასული წლის 23 მაისს ამერიკის შეერთებული შტატების კონგრესში შევიდა. მიმდინარე წლის 4 იანვარს, ჯო უილსონმა და სტივ კოენმა, კონგრესმენებმა და ჰელსინკის კომისიის მაშინდელმა თავმჯდომარეებმა ხელახლა წარადგინეს კანონპროექტი. ეს კანონპროექტი დამოუკიდებელია „ქართველი ხალხის აქტისგან“, რომელიც ორპარტიულმა ჯგუფმა აშშ-ს სენატში წარადგინა. აშშ-ის წარმომადგენელთა პალატის წყარომ „სამოქალაქო საქართველოს“ ადრე განუცხადა, რომ ორი კანონპროექტი შესაძლოა განხილვის შემდგომ ეტაპზე შეჯერდეს.

MEGOBARI აქტი ითვალისწინებს სანქციებს საქართველოს ხელისუფლების წინააღმდეგ ადამიანის უფლებების მასიური დარღვევისა და დემოკრატიული უკუსვლის გამო. ის ასევე ავალებს აშშ-ის სამთავრობო უწყებებს, ინფორმაცია წარუდგინონ კონგრესს საქართველოში რუსეთის დაზვერვის აქტივებისა და სანქციების თავიდან აცილების შესახებ.

კანონმდებლობა ხაზს უსვამს „ქართული ოცნების“ ხელისუფლების „სულ უფრო მტრულ“ პოზიციას დასავლელი პარტნიორებისა და სამოქალაქო საზოგადოების მიმართ. აქტი ითვალისწინებს აშშ-ის მხარდაჭერას საქართველოს დემოკრატიული განვითარებისთვის დემოკრატიის მონიტორინგის გზით.  

ასევე წაიკითხეთ:

• 17/12/2024 – სენატორი კარდინი მომიტინგეების სასტიკი დარბევის გამო „ქართული ოცნებისთვის“ მაგნიტსკის სანქციების დაწესებისკენ მოუწოდებს  
• 05/12/2024 – აშშ-ის სახელმწიფო მდივანი გმობს „ქართული ოცნების“ ძალადობას და დამატებით სანქციებს აანონსებს
• 02/12/2024 – სენატორები შაჰინი და რიში შეშფოთებას გამოხატავენ საქართველოში ძალადობის გამო, ხელისუფლების წინააღმდეგ სანქციებისკენ მოუწოდებენ
• 16/09/2024 – აშშ საქართველოში დემოკრატიის შელახვისთვის ახალ სანქციებს აწესებს

This post is also available in: English (ინგლისური)