გერმანია „ქართული ოცნების“ ოფიციალური პირებისთვის ქვეყანაში შესვლაზე დამატებით აკრძალვებს აწესებს

გერმანიის საგარეო საქმეთა სამინისტრომ 24 მარტს განაცხადა, რომ მან ქვეყანაში შესვლაზე დამატებითი აკრძალვები დაუწესა „ქართული ოცნების“ იმ ოფიციალურ პირებს, რომლებიც პროევროპული აქციების მონაწილეთა დარბევებზე არიან პასუხისმგებელნი.

სამინისტრომ აღნიშნა, რომ ქართველები რამდენიმე თვეა საპროტესტო აქციებს მართავენ ევროკავშირში გაწევრიანების სასარგებლოდ და საქართველოს ხელისუფლების კურსის წინააღმდეგ. მან ასევე განაცხადა, რომ მომიტინგეები დაშინების, დაპატიმრებებისა და ძალადობის სამიზნეები არიან და დასძინა, რომ რეპრესიებზე პასუხისმგებელ პირებს დამატებითი სანქციები დაუწესდათ, თუმცა არ დაუკონკრეტებია კონკრეტული პირების რაოდენობა და ვინაობა.

2024 წლის 31 დეკემბერს გერმანიამ ქვეყანაში შესვლაზე აკრძალვა დაუწესა ცხრა პირს, რომლებიც „საქართველოში მომიტინგეებისა და ოპოზიციის წევრების მიმართ ძალადობაზე არიან პასუხისმგებელნი“.

ასევე 2024 წლის დეკემბერში, გერმანიის ეკონომიკური თანამშრომლობისა და განვითარების ფედერალურმა მინისტრმა სვენია შულცემ განაცხადა, რომ საქართველოსთან განვითარების სფეროში თანამშრომლობის ახალი პროექტები არ დამტკიცდება ან ამოქმედდება და არც სასესხო ხელშეკრულებები გაფორმდება.

დემოკრატიული უკუსვლის, ადამიანის უფლებების დარღვევისა და რეპრესიების ფონზე, „ქართული ოცნების“ ოფიციალურ პირებსა და „რეჟიმის გამაძლიერებლებს“ სანქციები დაუწესეს ჩეხეთმა, ესტონეთმა, ლატვიამ, ლიეტუვამ, უკრაინამ, დიდმა ბრიტანეთმა და აშშ-მა.

ასევე წაიკითხეთ:

• 27/12/2024 – ანალენა ბერბოკი  „მიზანმიმართულ სანქციებსა“ და საქართველოს ევროპული მომავლის წინაშე არსებულ საფრთხეებზე საუბრობს
• 10/07/2024 – ფიშერი: გერმანია უარს ამბობს ახალ ფინანსურ ვალდებულებებზე, ტოვებს წვრთნებს, ხოლო სტუდენტურ ვიზებს ძალაში ტოვებს
• 05/04/2024 – გერმანია: „უცხოური გავლენის“ შესახებ კანონპროექტი ევროკავშირის წევრობას საფრთხეს უქმნის

This post is also available in: English (ინგლისური)