გერმანიაში დაიწყო სასამართლო პროცესი ისლამისტური ტერაქტების საქმეზე, რომელშიც სამი მოზარდია ბრალდებული

დიუსელდორფში დაიწყო პროცესი დაგეგმილი ისლამისტური ტერაქტების საქმეზე, რომელშიც გერმანიის მოქალაქე სამი არასრულწლოვანია ბრალდებული.

გამომძიებლების ინფორმაციით, 16 წლის გოგო და 15 და 17 წლის ბიჭები გასულ გაზაფხულზე ქრისტიანულ ეკლესიებზე შეიარაღებულ თავდასხმას გეგმავდნენ. დანაშაულის სავარაუდო ჩადენამდე ცოტა ხნით ადრე, სამივე ჩრდილოეთ რაინ-ვესტფალიაში დააკავეს.

საბრალდებო დასკვნაში ნათქვამია, რომ მუსლიმთა წმინდა თვის, რამადანის დროს, ერთ კვირა დღეს ბრალდებულები ეკლესიაში შეჭრას, იქ სროლისა და დანით თავდასხმის მოწყობას გეგმავდნენ. ამის შემდეგ ბრალდებულები, სავარაუდოდ, მოლოტოვის კოქტეილების გამოყენებით ტაძრებში ხანძრის გაჩენას აპირებდნენ. არასრულწლოვანები ერთმანეთში ასევე განიხილავდნენ ასაფეთქებელი მოწყობილობების შეძენასა და წარმოებას.

გერმანიის კონსტიტუციის დაცვის სამსახურმა ეჭვმიტანილთა ჯგუფზე ყურადღება მას შემდეგ გაამახვილა, რაც არასრულწლოვანმა გოგომ ტერორისტულ ორგანიზაცია "ისლამურ სახელმწიფოში" გაწევრიანების მიზნით, სირიაში გამგზავრების განაცხადი შეიტანა. მან ერთ-ერთ თანამზრახველს უამბო თავისი გეგმების შესახებ - ის ჯერ არ უპოვია პოლიციას. გამომძიებლებმა ტერორისტული თავდასხმების ორგანიზების გეგმების შესახებ გოგოს მობილური ტელეფონის "ჩათების" მონაცემთა ანალიზის შედეგად შეიტყვეს.

სასამართლო პროცესი, სავარაუდოდ, მარტის შუა რიცხვებამდე გაგრძელდება. დაგეგმილია ორმოცზე მეტი მოწმის მოსმენა.