გორში “ქართული ოცნების” დამფინანსებელთან დაკავშირებული კომპანია კორპუსს აშენებს

გორში, რობაქიძის ქუჩაზე კორპუსს “ქართული ოცნების” დამფინანსებელთან დაკავშირებული კომპანია აშენებს.

ოთხსართულიან კორპუსს შპს “რაპაქს” ჯგუფი აშენებს. აღნიშნული კომპანიის დირექტორი და 100%-იანი წილის მფლობელი თამარი გეგენავაა, რომლის იურიდიული მისამართი თბილისში, გიორგი სააკაძის ქუჩაზეა. ამავე მისამართზე ჩაწერილია სავარაუდოდ, გეგენავას ოჯახის წევრი – ზურაბ ჩხიკვაძე, რომელიც “ქართული ოცნების” დამფინანსებელია.

ზურაბ ჩხიკვაძემ “ქართულ ოცნებას” 2014-2020 წლებში თანხა 5-ჯერ გადაურიცხა, ჯამში 10 500 ლარის ოდენობით.

მშენებლობის ნებართვა გორის მუნიციპალიტეტის მერიისგან აღნიშნულმა კომპანიამ 2023 წელს მიიღო, ამ დროისთვის გორის მერის თანამდებობას ვლადიმერ ხინჩეგაშვილი იკავებდა.

დოკუმენტების მიხედვით, ნებართვას ვადა მიმდინარე წლის 3 ნოემბერს ეწურება.