დადასტურდა, რომ ივანიშვილი საქართველოში რუსული გავლენის აგენტია – ბოკუჩავა

მნიშვნელოვანია, ამერიკის შეერთებულ შტატებთან მუშაობა გავაგრძელოთ ბიძინა ივანიშვილის ოჯახის წევრების სანქცირების მიზნით, რათა ივანიშვილმა სანქციებისთვის თავის არიდება ოჯახის წევრების გამოყენებით ვერ შეძლოს, – ამის შესახებ „ერთიანობა – ნაციონალური მოძრაობის“ თავმჯდომარემ თინა ბოკუჩავამ განაცხადა.

როგორც ის აღნიშნავს, ამერიკის შეერთებული შტატების მიერ ბიძინა ივანიშვილის დასანქცირება „ადასტურებს, რომ ის საქართველოში რუსული გავლენის აგენტია“.

ბოკუჩავას თქმითვე, სანქციების შედეგად „ქართული ოცნების“ საპატიო თავმჯდომარის ქონება ტოტალურად გაუფასურდა.

„ამერიკის შეერთებული შტატების მთავრობამ სანქციების გუშინდელი გადაწყვეტილებით დაადასტურა, რომ ივანიშვილი რუსულ ინტერესებს, რუსულ სარგებელს ემსახურება და რომ ის, საქართველოში რუსული გავლენის აგენტია. ეს არის სწორედ ამერიკული სანქციების სამართლებრივი საფუძველი, რომელიც აშშ-ს სახაზინო დეპარტამენტმა დააწესა ე.წ. ოფაკის მექანიზმის გამოყენებით, ანუ საგარეო აქტივების კონტროლის ოფისის გამოყენებით, რომელიც განსხვავდება გლობალური “მაგნიცკის აქტისგან” და ეფუძნება სწორედ ივანიშვილის რუსული კავშირების, რუსული სარგებლისთვის მუშაობის ფაქტს. ივანიშვილის აქტივები დასანქცირდა ამერიკაში, მას აეკრძალა ნებისმიერი აქტივის ლეგალურად გაყიდვა, იქნება ეს უძრავი ქონება, ფასიანი ქაღალდები, თუ მაგალითად, ფერწერული ტილო. ის ვეღარ შეძლებს, რომ ლეგალურად გაყიდოს ნებისმიერი აქტივი, ხოლო „შავ ბაზარზე“ ამგვარი აქტივების გაყიდვის შემთხვევაში კარგად გვესმის, რომ საბაზრო ღირებულების 10%-საც კი არ შეადგენს, რაც იმას ნიშნავს, რომ ივანიშვილის ქონება სანქციების შედეგად ტოტალურად გაუფასურდა. ივანიშვილი ვერ განახორციელებს ვერც ერთ ფინანსურ ტრანზაქციას ამერიკულ დოლარში. უნდა გვესმოდეს, რომ ნებისმიერი საერთაშორისო გადარიცხვა, რაც შეიძლება ქართული ბანკების გამოყენებით განხორციელდეს, ამერიკული ბანკების გავლით, ე.წ. საშუამავლო ბანკების გავლით, რომლებიც მომენტალურად დაბლოკავენ ნებისმიერ ამგვარ ტრანზაქციას. „ოფაკის“ სანქციები მოიცავს ე.წ. მეორად ეფექტს, რაც იმას გულისხმობს, რომ ნებისმიერი პირი, ან ორგანიზაცია, რომელიც ივანიშვილის სანქცირებულ ტრანზაქციასთან იქნება შემხებლობაში, შეიძლება ამერიკული სანქციების სამიზნე გახდეს. ნებისმიერი ქართული ბანკი, თუ დაუშვებს ივანიშვილისთვის ნებისმიერ ტრანზაქციას, თავად აღნიშნული ბანკიც შესაძლოა, დასანქცირდეს აშშ-ს მიერ, ეროვნული ბანკის, ან ნებისმიერი კომერციული ბანკის მხრიდან სასანქციო რეჟიმის დარღვევა უდიდეს დარტყმას მიაყენებს ქართულ საბანკო სისტემას და შესაბამისად, ტოტალურად ჩამოშლის ქართულ ეკონომიკას, ამიტომ დიდი იმედი მაქვს, რომ ეროვნული ბანკი და არც ერთი კომერციული ბანკი ამ უდიდეს რისკზე, ქართული სახელმწიფოს და საქართველოს მოქალაქეების წინააღმდეგ არ წავლენ.

ივანიშვილს ასევე დაებლოკა წვდომა სინგაპურის სასამართლოს გადაწყვეტილებით მისაღებ ასეულობით მილიონ დოლარზე. ივანიშვილი ამერიკის შეერთებულმა შტატებმა ტოტალურ ფინანსურ იზოლაციაში მოაქცია და რამდენი „ქეშიც“ არ უნდა ჰქონდეს მას განსაკარგად, ამგვარ ტოტალურ ფინანსურ იზოლაციაში ვერ ისარგებლებს ვერც ერთი საბანკო მომსახურებით. ის დიდ ხანს ნამდვილად ვერ გაძლებს და ძალიან გაუჭირდება „ქეშით“ ოპერირება“, – განაცხადა ბოკუჩავამ.

მისივე თქმით, „ივანიშვილის კრიმინალურ რეჟიმთან შეზრდილი ბიზნესი მას უნდა განუდგეს“.

„მნიშვნელოვანია, ამერიკის შეერთებულ შტატებთან მუშაობა გავაგრძელოთ მისი ოჯახის წევრების სანქცირების მიზნით იმისთვის, რომ ივანიშვილმა სანქციებისთვის თავის არიდება ოჯახის წევრების გამოყენებით ვერ შეძლოს. ვიცით, რომ მისი ქალიშვილი აშშ-ში ცხოვრობს, გარკვეული ბიზნესები აქვს და დარწმუნებული ვარ, ამერიკის შეერთებული შტატები ამ სანქციების გაფართოებაზე გააგრძელებს მუშაობას. ჩვენ ასევე გავაგრძელებთ მუშაობას ივანიშვილის კრიმინალურ რეჟიმთან შეზრდილ ბიზნესთან იმისთვის, რომ მათი დასანქცირებაც მოხდეს. თუ პატრიოტული შეგრძნებებით არა, თვითგადარჩენის ინსტინქტით მაინც უნდა იხელმძღვანელოს ივანიშვილის კრიმინალურ რეჟიმთან შეზრდილმა ბიზნესმა და ივანიშვილის დანაშაულებრივ, სანქცირებულ რეჟიმს თავის გადარჩენის მიზნით მაინც განუდგეს“, – განაცხადა ბოკუჩავამ.

ცნობისთვის, აშშ-ის სახაზინო დეპარტამენტმა „ქართული ოცნების“ საპატიო თავმჯდომარეს, ბიძინა ივანიშვილს სანქციები დაუწესა. ამის შესახებ განცხადებას აშშ-ის სახაზინო დეპარტამენტის უცხოური აქტივების კონტროლის ოფისი (OFAC) ავრცელებს.

განცხადების თანახმად, „როგორც რუსეთთან დაკავშირებულ პირზე, ბიძინა ივანიშვილზე და მის მიერ კონტროლირებულ კომპანიებზე სანქციების შედეგად რიგი შეზღუდვები წესდება. შეზღუდვები ვრცელდება ყველა ტრანზაქციაში, რომელშიც ივანიშვილის მფლობელობაში მყოფი ნებისმიერი კომპანია მიიღებს მონაწილეობას, მიუხედავად იმისა ის მას პირდაპირ თუ არაპირდაპირ აკონტრლებს, ინდივიდუალურად თუ ჯგუფურად, 50%-ს თუ მეტს”.

ამასთან, როგორც აშშ-ის სახელმწიფო მდივანი, ენტონი ბლინკენი აცხადებს, „შეერთებული შტატები ასანქცირებს ბიძინა ივანიშვილს, საქართველოს მმართველი პარტიის, „ქართული ოცნების” დამაარსებელსა და საპატიო თავმჯდომარეს რუსეთის ფედერაციის სასარგებლოდ საქართველოს დემოკრატიისა და ევროატლანტიკური მომავლის ძირის გამოთხრისთვის”.

„ბიძინა ივანიშვილი სანქცირებულია აღმასრულებელი ბრძანება №14024 მუხლი 1(a)(ii)(C)-ის საფუძველზე, ვინაიდან ის არის პასუხისმგებელი ან თანამონაწილე, ან პირდაპირ თუ ირიბად ჩართული, ან მცდელობა გაუწევია ისეთი ქმედებებისა თუ პოლიტიკისთვის, რომელიც ძირს უთხრის დემოკრატიულ პროცესებს ან ინსტიტუტებს როგორც შეერთებულ შტატებში, ისე საზღვარგარეთ, რუსეთის ფედერაციის მთავრობის პირდაპირი თუ ირიბი სარგებლისთვის”, – ნათქვამია განცხადებაში.