“დათანხმდება თუ არა პუტინი ტრამპის სამშვიდობო შეთავაზებას და რას უნდა ველოდოთ მომავალში?” – ზურაბ ბატიაშვილი

დათანხმდება თუ არა პუტინი ტრამპის სამშვიდობო შეთავაზებას და რას უნდა ველოდოთ მომავალში?

ჩემი აზრით, ძნელად წარმოსადგენია ამ ეტაპზე კრემლი დათანხმდეს ტრამპის წინადადებას და აი, რატომ:

– პუტინის გადმოსახედიდან, მას ჯერ სანახევროდაც არ მიუღწევია იმ მიზნისთვის, რისთვისაც მან უკრაინასთან ომი დაიწყო. 2022 წელს მისი მიზანი არ ყოფილა ლუგანსკის ან დონეცკის ოლქის დაპყრობა. მისი მიზანი იყო და არის უკრაინის სრული ოკუპაცია, რადგან უკრაინისა და კავკასიის ფლობის გარეშე პუტინის მთავარი ამოცანა/იდეა-ფიქსი – რუსეთის იმპერიის აღდგენა ვერ განხორციელდება;

– ტრამპის სამშვიდობო გეგმა უკრაინისთვის უსაფრთხოების გარანტიებსაც მოიცავს – დაშორიშორების ხაზზე ევროპული ქვეყნების ჯარები უნდა ჩადგნენ. ეს კი პუტინს არ აწყობს, რადგან ომის შეწყვეტისას შემდგომ პერიოდს ვეღარ გამოიყენებს ძალების მოკრებისა და უკრაინაზე ხელახალი თავდასხმისთვის;

– ტრამპი თავის სამშვიდობო შეთავაზებაში საუბრობს რუსეთის ადამიანურ და ფინანსურ დანაკარგებზე. მაგრამ არ უნდა დაგვავიწყდეს, რომ პუტინი, როდესაც საქმე იმპერიის აღდგენას ეხება, არ მოქმედებს საღი აზრისა და ლოგიკის ფარგლებში (ეს კარგად დავინახეთ 2022 წლის თებერვალში უკრაინასთან სრულმასშტაბიანი ომის დაწყებისას და შემდეგ ქმედებებშიც);

– პუტინი თვლის, რომ სამხედრო ინიციატივა და უპირატესობა მის ხელშია. იგი იმყოფება ომის ერთგვარ ხიბლში. მისი ნაწილები მართალია დიდი დანაკარგებით და ძალიან ნელა, მაგრამ მაინც წინ მიიწევენ, რაც მას უქმნის ამ ომში წარმატების მიღწევის ილუზიას და ფიქრობს, რომ მომავალშიც ასე შეუძლია გააგრძელოს.

საპასუხოდ, მოსკოვს შეუძლია პირდაპირი უარი არ უთხრას ვაშინგტონს და დროის გაწელვის მიზნით შექმნას მოლაპარაკებების წარმოების ილუზია (აწარმოოს მოლაპარაკებები მოლაპარაკებებისთვის), რაც არაერთხელ გაუკეთებია მას.

რუსეთს ასევე შეუძლია თავისი ე.წ. proxy-ების საშუალებით სხვა ადგილებში დაარტყას დასავლეთსა და მის მოკავშირეებს (მაგალითად, როგორიც იყო “ჰამასის” მიერ ისრაელზე განხორციელებული თავდასხმა 2023 წლის 7 ოქტომბერს) და უკრაინის საკითხი გარკვეული პერიოდით ჩრდილში გადაწიოს.

მოსკოვს ასევე შეუძლია წაახალისოს რომელიმე ტერორისტული ორგანიზაციის თავდასხმა დასავლეთზე/დასავლეთში იმ მიზნით, რომ მერე ტერორიზმის წინააღმდეგ თანამშრომლობა შესთავაზოს იგივე ტრამპს.

ვნახოთ, რომელ სცენარს/სცენარებს აირჩევს პუტინი. ეს უახლოეს მომავალში გამოჩნდება.

ტრამპს და შეერთებულ შტატებს კი არაერთი ინსტრუმენტი გააჩნია რუსეთზე ზეწოლის გასაძლიერებლად. ამის შესახებ ტრაპმსა და მის გუნდს არაერთხელ უსაუბრიათ: ესაა, როგორც რუსეთის წინააღმდეგ ახალი სანქციების შემოღება, ისე – უკრაინისთვის უფრო მეტი შეიარაღების მიწოდება. ეს საკითხები შეიძლება დაიძრას მაშინ, როდესაც მეტ-ნაკლებად ცნობილი იქნება რუსეთის პასუხი.

ისევ რეალური მოლაპარაკებების საკითხს რომ დავუბრუნდეთ. ჩემი აზრით, პუტინი მხოლოდ იმ შემთხვევაში დათანხმდება ნამდვილ მოლაპარაკებებს, თუ იგი ომის წაგებისა და ხელისუფლების დაკარგვის რეალურ საფრთხეს იგრძნობს.