დაკავებული რუსეთის მოქალაქეები და აქტივისტები პოლიტიკურ დევნაზე საუბრობენ

თბილისის საქალაქო სასამართლომ 14 მარტს რუსეთის ორი მოქალაქის, ანასტასია ზინოვკინასა და არტემ გრიბულის საქმე განიხილა. წყვილს, რომელსაც ბრალი სისხლის სამართლის კოდექსის 260-ე მუხლის მე-6 პუნქტის ა) ქვეპუნქტით ედება, განსაკუთრებით დიდი ოდენობით ნარკოტიკული საშუალებების შეძინა-შენახვის ბრალდებით 8-დან 20 წლამდე ან უვადო თავისუფლების აღკვეთა ემუქრებათ. მათი შემდეგი სასამართლო სხდომა 1 აპრილს ჩაინიშნა.

ზინოვკინა და გრიბული 2024 წლის 17 დეკემბერს დააკავეს. საქმე კრიმინალური პოლიციის დეტექტივის ჯემალ მირაზანაშვილის ინფორმაციის საფუძველზე აღიძრა, რომელმაც განაცხადა, რომ მიიღო ოპერატიული ინფორმაცია, რომ რუსეთის მოქალაქეები ზინოვკინა და გრიბული ნარკოტიკებს ფლობდნენ გასავრცელებლად. მან ასევე აღნიშნა, რომ ისინი ნარკოტიკების უკანონო შეძენა-შენახვასა და რეალიზაციას ახდენდნენ. ორივე მათგანი უარყოფს ბრალდებას და აცხადებს, რომ პოლიციამ მათ ნარკოტიკი ჩაუდო. პროკურატურა აცხადებს, რომ მათი სახლისა და პირადი ნივთების ჩხრეკისას ამოღებულია 16 გრამი სინთეზური ნარკოტიკული საშუალება ალფა-PVP.  

13 მარტის პროცესი ხმაურით დაიწყო. საბადრაგო სამსახურის გადაწყვეტილებით, უსაფრთხოების არგუმენტით, ბრალდებული ცოლ-ქმარი ცალ-ცალკე ადგილებზე განათავსეს, რასაც მათი პროტესტი მოჰყვა. ადვოკატმა შოთა თუთბერიძემ საბადრაგო სამსახურის თანამშრომელი ბრალდებულის შეურაცხყოფაში დაადანაშაულა და მოსამართლეს მისი იდენტიფიცირება სთხოვა. მოსამართლემ ადვოკატის მოთხოვნა არ დააკმაყოფილა, არც საბადრაგო სამსახურის თანამშრომლის იდენტიფიცირება მოახდინა და არც ბრალდებულების გვერდიგვერდ განთავსებაზე დაცვის მხარის მოთხოვნა დააკმაყოფლა.

ბრალდებულები ბრალს არ აღიარებენ და მათ დაკავებას თბილისში ბოლო საპროტესტო აქციებში მონაწილეობას უკავშირებენ. დაცვის მხარე ამტკიცებდა, რომ დაკავებები პოლიტიკურად მოტივირებული იყო და ისინი საპროტესტო აქციებში წყვილის მონაწილეობას უკავშირდება. გრიბულის თქმით, მას პოლიციელმა უთხრა, რომ საპროტესტო აქციებში მონაწილეობისთვის ისჯებოდა. ზინოვკინამ განაცხადა, რომ იგი მამაკაცმა პოლიციელმა გაჩხრიკა და რომ სექსუალურ შევიწროებას ჰქონდა ადგილი როგორც ჩხრეკის, ისე დაკავების დროს.

ბრალდებულები აცხადებენ, რომ მოსამართლე ნინო გალუსტაშვილი სანქცირებული მოსამართლეა და ამიტომ არ უნდა განიხილოს პოლიტიკური საქმეები, რადგან მისი ობიექტურობა ეჭვქვეშაა.

მათი ადვოკატის თქმით, დაცვის მხარის მოთხოვნა დაკავების ადგილიდან სათვალთვალო კამერების ჩანაწერების მიღებაზე არ დაკმაყოფილდა. თუთბერიძე აცხადებს, რომ ჩანაწერები დაადასტურებმდა, რომ დაკავებულებს ნარკოტიკი ჩაუდეს.

ბრალდების მხარე ორი მოწმის, მათ შორის თარჯიმნისა და ნაქირავები ბინის მეპატრონის ჩვენებებს დაეყრდნო, რომელთაც დაადასტურეს ნარკოტიკების პოვნა. თუმცა, დაცვის მხარემ უარყო ეს და განაცხადა, რომ ბრალდებულებს ჩანთები და ქურთუკები ჩამოართვეს და მხოლოდ მას შემდეგ დაუბრუნეს, რაც გამომძიებელი და თარჯიმანი მივიდნენ, რა დროსაც, სავარაუდოდ, ნარკოტიკები ჩაუდეს.

ზინოვკინა და გრიბული, ორივე რუსი აქტივისტი, საქართველოში 2022 წელს გადმოსახლდნენ. ზინოვკინა აქტიურად იყო ჩართული ოპოზიციურ მოძრაობებში 2012 წლიდან, მხარს უჭერდა „ღია რუსეთს“ – პოლიტიკურ ორგანიზაციას, რომელიც დევნილმა ბიზნესმენმა მიხეილ ხოდორკოვსკიმ დააარსა. იგი ასევე მონაწილეობდა რუსეთის პრეზიდენტის ვლადიმირ პუტინის წინააღმდეგ საპროტესტო აქციებში.

ანალიგიურად ნარკოტიკებთან დაკავშირებული ბრალდებით პატიმრობაში რჩება რუსეთის კიდევ ერთი მოქალაქე, ანტონ ჩეჩინი. ზინოვკინას და გრიბულის მსგავსად, ის ასევე მონაწილეობდა საქართველოში პროევროპულ აქციებში და ღიად ეწინააღმდეგებოდა პუტინის ხელისუფლებას.

ასევე წაიკითხეთ:

• 21/01/2025 – თბილისის საქალაქო სასამართლომ აქციის ორი მონაწილე პატიმრობაში დატოვა

This post is also available in: English (ინგლისური)