დიპლომატიური პასპორტებისთვის უვიზო მიმოსვლის შეჩერებას იანვრის ბოლოსთვის ურიან კენჭს - ევროკომისარი

ევროკომისარი გაფართოების საკითხებში, მარტა კოსი აცხადებს, რომ ევროკავშირის წევრი ქვეყნები 2025 წლის იანვრის ბოლომდე უყრიან კენჭს ევროკომისიის ინიციატივას დიპლომატიური პასპორტებისთვის უვიზო მიმოსვლის შეჩერებაზე.

„ჩვენ გამოვედით წინადადებით, რომ ნაწილობრივ შეჩერდეს ევროკავშირი-საქართველოს სავიზო რეჟიმის გამარტივების შესახებ შეთანხმება, რათა საქართველოში გაცემული დიპლომატიური სამსახურის პასპორტების მფლობელებისთვის სავიზო მოთხოვნები შემოვიღოთ“, - განაცხადა მარტა კოსმა 14 იანვარს და დასძინა:

„ევროკავშირის წევრი ქვეყნები ამ ინიციატივას კენჭს იანვრის ბოლოსთვის უყრიან“.

2024 წლის 20 დეკემბერს, - ბრიუსელში ამ თემაზე დისკუსიების კვალდაკვალ, - ევროკომისიამ ოფიციალურად გამოაცხადა, რომ ევროპულ საბჭოს დასამტკიცებლად წარუდგენს წინადადებას ქართული დიპლომატიური პასპორტებისთვის ევროკავშირში უვიზო მიმოსვლის შეჩერების შესახებ.

საქართველოს მთავრობის 2015 წელს მიღებული 176-ე დადგენილება სამსახურებრივი სარგებლობის პასპორტის გაცემის წესის დამტკიცების შესახებ განმარტავს, რომ სამსახურებრივი სარგებლობის პასპორტი ორი ტიპისაა:

1. დიპლომატიური პასპორტი;
2. სამსახურებრივი პასპორტი.

როგორც ევროკომისიის პრეზიდენტმა კაია კალასმა განაცხადა, შეზღუდვა ორივე კატეგორიის პასპორტებს ეხება.

მთავრობის 176-ე დადგენილება განსაზღვრავს იმ პირთა სიას, რომლებზეც შეიძლება დიპლომატიური და სამსახურებრივი პასპორტების გაცემა.

დადგენილებაში წლების განმავლობაში არაერთი ცვლილებაა შეტანილი და ამჟამად იგი დიპლომატიური პასპორტების მფლობელთა 41 კატეგორიას განსაზღვრავს.

ამ სიაში არიან:

• უმაღლესი თანამდებობის პირები - პრეზიდენტი, პრემიერ-მინისტრი და პარლამენტის თავმჯდომარე - მეუღლეებითურთ;
• უზენაესი და საკონსტიტუციო სასამართლოების თავმჯდომარეები და წევრები;
• უსაფრთხოების სამსახურის უფროსი, მისი მოადგილეები და ამ სამსახურის 50-მდე თანამშრომელი;
• მინისტრები და პარლამენტარები;
• გენერალური პროკურორი, ცესკოს თავმჯდომარე და ეროვნული ბანკის პრეზიდენტი;
• კათოლიკოს-პატრიარქი და საპატრიარქოს რამდენიმე იერარქი;
• სახალხო დამცველი და სხვები.

2015 წლის 17 დეკემბრის ცვლილებით, „განსაკუთრებულ შემთხვევებში“ პრემიერ-მინისტრის გადაწყვეტილებით, დიპლომატიური პასპორტი შეიძლება გაიცეს იმ პირებზე, რომლებიც არ არიან გათვალისწინებული ამ სიაში.

მარტა კოსმა 14 იანვარს ასევე განაცხადა, რომ ევროკავშირმა შეაჩერა საქართველოს მთავრობისათის გამოყოფილი 100 მილიონი ევრო და განიხილავს შესაძლებლობებს თანხების სხვა მიზნებით განკარგვასთან დაკავშირებით, - კერძოდ, 8.5 მილიონი ევრო გადაამისამართეს სამოქალაქო საზოგადოების დასახმარებლად, იმავე მიზნობრიობით გამზადებულია კიდევ 7.5 მილიონი ევრო.

მისი განცხადებით, საქართველოში შექმნილი ვითარება არის „შეხსენება, რომ ევროკავშირში გაწევრიანება ადვილი არ არის და რომ უკუსვლა შეიძლება მოხდეს - და ეს ხდება კიდეც“.

„ვწუხვარ, რომ ხელისუფლება განაგრძობდა ევროკავშირის ინტეგრაციის საპირისპიროდ სვლას. ქართველი ხალხის არჩევანი ევროკავშირში ინტეგრაციის შესახებ იყო ჩადებული კონსტიტუციურ ვალდებულებაში. ისინი ყოველ ღამე გამოდიან ქუჩაში, რადგან აშკარად სურთ ამის შენარჩუნება“, - განაცხადა მარტა კოსმა.

მან „სრულიად მიუღებელი“ უწოდა ხელისუფლების ქმედებებს მშვიდობიანი მომიტინგეების, ოპოზიციის წარმომადგენლების, სამოქალაქო საზოგადოების ორგანიზაციებისა და ჟურნალისტების მიმართ.