დრონებით შეტევის შედეგად ხანძარია რუსეთის ვორონეჟის ოლქის ნავთობის საცავში

პირველი ცნობა უპილოტო საფრენი აპარატებით შეტევის და ნავთობის ბაზაზე ხანძრის შესახებ გუსევის ტელეგრამ-არხზე 16 იანვარს, შუაღამის შემდეგ გამოქვეყნდა.

დილით გუბერნატორმა ტელეგრამზე დაწერა, რომ ღამის განმავლობაში ვორონეჟის ოლქის სამ რაიონს შეუტიეს 10-ზე მეტი დრონით, რომელთა „უდიდესი ნაწილი მოდის ლისკის რაიონში მდებარე ნავთობის ბაზაზე“.

გუსევი ხანძრის მასშტაბს არ აკონკრეტებს, თუმცა მის მიერ ზოგადად ჩამოთვლილი ტექნიკის რაოდენობაც კი იძლევა იმის თქმის შესაძლებლობას, რომ ნავთობის საცავში სერიოზული ხანძარია. გუბერნატორის თანახმად, „რამდენიმე რეზერვუარში“ ცეცხლს ებრძვიან მეხანძრეების „გაძლიერებული“ რაზმები ათეულობით ტექნიკით და ორი სახანძრო მატარებლით და დამატებითი ძალებია გაგზავნილი მეზობელი რეგიონებიდან.

გუსევის ინფორმაციით, არავინ დაშავებულა, წინასწარი მონაცემებით მოქალაქეების ქონება არ დაზიანებულა და მოსახლეობას საფრთხე არ ემუქრება.

ვორონეჟის ოლქი რუსეთის იმ რეგიონებს შორისაა, სადაც უკრაინის თავდაცვის ძალები ხშირად უტევენ ნავთობგადამამუშავებელ ქარხნებს, ნავთობის ბაზებს და სამხედრო ობიექტებს.

რუსეთთან ომში მყოფ უკრაინას რუსეთის ტერიტორიაზე და ანექსირებულ ყირიმში კანონიერ სამიზნედ აქვს გამოცხადებული სამხედრო ობიექტები და საწარმოები, რომლებიც რუსული არმიის მომარაგებაზე მუშაობენ.

BBC-ს რუსული სამსახურის ინფორმაციით, 2024 წელს უკრაინამ რუსეთის ტერიტორიაზე და ანექსირებულ ყირიმში დრონებით, სულ მცირე, 81-ჯერ შეუტია ნავთობგადამამუშავებელ საწარმოებს და საწვავის საცავებს.