“დღეს ივანიშვილის ბედი კობახიძის კეთილ ნებაზეა დამოკიდებული” – გოჩა მირცხულავა

2

ჟურნალისტი, გოჩა მირცხულავა:

სრულიად სერიოზულად!

რა ხდება თუ ერთ დღესაც ირაკლი კობახიძე იტყვის: “ბიძინა ივანიშვილი გადადგა”. გადადგა პირობითად – შეუძლია თქვას: დაკავებულია, გაძევებულია ქვეყნიდან, იმყოფება შინა პატიმრობაში.

ამ ყველაფერს, დღეს, მხოლოდ და მხოლოდ ორი ადამიანის – ვახტანგ გომელაურისა და ანზორ ჩუბინიძის განეიტრალება სჭირდება.

ივანიშვილის ძალაუფლება ამ დრომდე იდგა იმაზე, რომ ყველა მისი კაცი იყო. ახლა იმას ნუ დაიჯერებთ, რომ დღეს “ხელისუფლებაში” ყველა მისია. შესაძლოა, ივანიშვილი თავად ფიქრობს, რომ “ყველა” მისია და იმავეს ფიქრობს ბევრი მისი მხარდამჭერი თუ მოწინააღმდეგე, მაგრამ არ არის ასე…

ახლა განვიხილოთ ეს მომენტიც… უდავოა, რომ ირაკლი კობახიძე გამორჩეულად ძლიერი ფიგურაა “ქართულ ოცნებაში”. იგი საკმაოდ კარგად ერკვევა პოლიტიკურ ინტრიგებშიც და თუ მის პოლიტიკურ კარიერას დავაკვირდებით, მრავალსვლიან კომბინაციებსაც კარგად თამაშობს.

ვინც ბრმა არ არის, ისიც უნდა აღიაროს, რომ კობახიძე დღეს ერთპიროვნულად, საკუთარი კადრების მეშვეობით მართავს “ოცნების” ხელისუფლების სრულ ვერტიკალს. ისიც უნდა ვაღიაროთ, რომ “ოცნების” ელიტაში აღარ არსებობს შიდა კლანები – კობახიძემ შეძლო ამ ველის მოსუფთავებაც. უნდა აღინიშნოს, რომ ივანიშვილისთვის ეს თითქოს კომფორტული მდგომარეობაა, მაგრამ ის მუდამ მიჩვეული იყო პირადი ძალაუფლების შენარჩუნება-გამტკიცებას სწორედ კლანების შექმნის ხელშეწყობით, შემდეგ მათი დაპირისპირების პროვოცირებითა და მუდამ სასურველი შედეგის დაყენებით.

დღეს შექმნილი ვითარებიდან გამომდინარე ივანიშვილის ბედი ერთგვარად კობახიძის კეთილ ნებაზეა დამოკიდებული.

რატომ? ამ ძალაუფლების ფლობის პირობებში, სადამდე მოუნდება კობახიძეს ივანიშვილის “ფრთის ქვეშ” ყოფნა და რა მიზნით? მიზანი განსაზღვრავს ვადებსაც.

თუ “ოცნებამ” – რეალურად კობახიძემ და მისმა სახელისუფლებო ვერტიკალმა მოსკოვის დირექტივები უნდა ასრულოს ივანიშვილის გავლით, ჟანრის ლოგიკაა, რა საჭიროა ივანიშვილი, როგორც შუა რგოლი?

მოსკოვში იდიოტები კი არ სხედან, ვერ ხედავდნენ ვის აქვს პროცესი მხრებზე წამოკიდებული.

ამიტომ…. ამიტომ… ამიტომ…

არც შინ აქვს ივანიშვილს კარგად საქმე და არც გარეთ… ჰო, ქონების ექსპროპრიაციის თემაც არ უნდა იყოს მეორეხარისხოვანი …