ევროპარლამენტმა საქართველოში მედიის თავისუფლებასა და მზია ამაღლობელზე იმსჯელა

18 ივნისს, ევროპარლამენტის წევრებმა საქართველოში მედიის თავისუფლებაზე იმსჯელეს, რა დროსაც ყურადღება გაამახვილეს დაკავებული ჟურნალისტისა და ონლაინ საშუალებების „ბათუმელებისა“ და „ნეტგაზეთის“ დამფუძნებლის, მზია ამაღლობელის საქმეზე.

ევროპარლამენტარებმა შვიდი შუამდგომლობა დააყენეს კენჭისყრაზე და მათი უმეტესობა ამაღლობელის გათავისუფლებას მოითხოვდა.

„ჟურნალისტი მზია ამაღლობელი ბიძინა ივანიშვილის რეჟიმის მიერ დაპატიმრებული ყველა ქართველის სიმბოლოდ იქცა“, – განაცხადა ლიეტუველმა ევროპარლამენტარმა რასა იუკნევიჩიენემ. იუკნევიჩიენემ გააფრთხილა თავისი კოლეგები, რომ საქართველოში სიტუაცია „ყოველდღე უარესდება“.

დებატების დროს ევროპარლამენტარებმა განაცხადეს, რომ საქართველოს ხელისუფლება სულ უფრო მძაფრად უპირისპირდება მედიასა და სამოქალაქო საზოგადოებას და ამ მიზნით ბელარუსსა და რუსეთში გამოყენებულ მოდელს იყენებს. მათივე თქმით, საქართველოში გამოხატვის თავისუფლება სულ უფრო მცირდება, რაც მიუღებელია ევროკავშირის კანდიდატი ქვეყნის სტატუსის მქონე ქვეყნისთვის.

This post is also available in: English