ევროპის საბჭოს მინისტრთა კომიტეტი ანტი-ლგბტ კანონის გაუქმებისკენ მოუწოდებს

ევროპის საბჭოს მინისტრთა კომიტეტი მოუწოდებს საქართველოს ხელისუფლებას, გააუქმოს ანტი-ლგბტ კანონი „ოჯახური ღირებულებებისა და არასრულწლოვანთა დაცვის შესახებ“, რომელიც ქვეყანაში ლგბტ პირთა უფლებებს, მათ შორის გამოხატვის თავისუფლებასა და შეკრების თავისუფლებას არღვევს.

6 მარტს მინისტრთა კომიტეტმა, რომელიც ადამიანის უფლებათა ევროპული სასამართლოს გადაწყვეტილებების აღსრულებაზე ზედამხედველობას ახორციელებს, შუალედური რეზოლუცია მიიღო „იდენტობა და სხვები“ საქმეების ჯგუფზე საქართველოს წინააღმდეგ, რომელშიც მინისტრებმა კატეგორიულად მოუწოდეს საქართველოს ებრძოლოს დისკრიმინაციასა და სიძულვილით მოტივირებულ დანაშაულებს, ადამიანის უფლებათა ევროპული კონვენციით ნაკისრი ვალდებულებების შესაბამისად.

საქმეები ეხება ხელისუფლების წარუმატებლობას უზრუნველყოს ადეკვატური დაცვა ჰომოფობიური ან რელიგიურად მოტივირებული თავდასხმების წინააღმდეგ, ასევე ლგბტ პირებისთვის შეკრების თავისუფლება და რელიგიური უმცირესობების თავისუფლება.

რეზოლუცია კატეგორიულად მოუწოდებს ხელისუფლებას დააჩქაროს და დაასრულოს ყველა განახლებული გამოძიება და სასამართლო პროცესები, განახორციელოს საჭირო საგამოძიებო მოქმედებები ევროპული სასამართლოს დასკვნების შესაბამისად, უზრუნველყოს სისხლის სამართლის საქმეების სწორი კვალიფიკაცია და ყველა მოსარჩელეს დაზარალებულის სტატუსი მიანიჭოს.

ამის გათვალისწინებით, კომიტეტმა წუხილი გამოთქვა ანტი-ლგბტ კანონის ამოქმედების გამო და ხელისუფლებას მისი გაუქმებისკენ მოუწოდა. კომიტეტს მიაჩნია, რომ ეს კანონი უკან გადადგმულ ნაბიჯს წარმოადგენს ამ საქმეების აღსრულებაში და სერიოზულ კითხვებს აჩენს საქართველოს მიერ ევროპული სასამართლოს გადაწყვეტილებების შესრულების კუთხით.

გარდა ამისა, მინისტრთა კომიტეტმა მკაცრად მოუწოდა სახელმწიფოს, დაგმოს დისკრიმინაციული ნარატივები და იბრძოლოს ყველა ფორმის დისკრიმინაციის, სიძულვილის ენისა და სიძულვილით მოტივირებული დანაშაულების წინააღმდეგ, მათ შორის, უმაღლეს დონეზე არაორაზროვანი ნულოვანი ტოლერანტობის რიტორიკის გამოყენებით და დაუსჯელობის დასრულებისთვის მტკიცე ნაბიჯების გადადგმით.

მინისტრთა კომიტეტმა ხელისუფლებას მოუწოდა, უზრუნველყოს შეკრებისა და რელიგიის თავისუფლება ყველასათვის, დაცვისა და აღკვეთის უფრო ძლიერი ზომების მიღებით და სიძულვილით მოტივირებულ ძალადობაზე მკაცრი რეაგირებით.

ასევე წაიკითხეთ:

• 25/02/2025 – „ქართული ოცნება“ კანონმდებლობიდან „გენდერის“ ამოსაღებად ცვლილებებს აინიცირებს
• 20/09/2024 – ანტი-ლგბტ კანონმდებლობის მიღებას საერთაშორისო გამოხმაურებები მოყვა

This post is also available in: English (ინგლისური)