ელისაშვილს მოწმე პოლიციელის მიმართ გამოხატული „უპატივცემულობის“ გამო ახალი ბრალდება წაუყენეს

დაპატიმრებულ ოპოზიციონერ პოლიტიკოს ალეკო ელისაშვილს ახალი სისხლის სამართლის ბრალდება წაუყენეს „სასამართლოს უპატივცემულობის“ გამო მას შემდეგ, რაც პროკურორმა მას ბრალი დასდო პოლიციელის „შეურაცხყოფაში“, რომელიც სასამართლოში მოწმის სტატუსით აძლევდა ჩვენებას. დანაშაული, რომელიც განსაზღვრულია საქართველოს სისხლის სამართლის კოდექსის 366-ე მუხლით, ითვალისწინებს ჯარიმას, საზოგადოებისთვის სასარგებლო შრომას ან ერთ წლამდე თავისუფლების აღკვეთას.

ადგილობრივი მედია იტყობინება მის ადვოკატზე, გიორგი რეხვიაშვილზე დაყრდნოპბით, რომ ელისაშვილის წინააღმდეგ ახალი საქმე, რომელიც პროკურორმა ანი ხუბეჯაშვილმა აღძრა, გამომდინარეობს პოლიტიკოსის მიერ სასამართლო სხდომაზე გაკეთებული რეპლიკიდან, როდესაც მან, სავარაუდოდ, პოლიციელ შოთა ჭიპაშვილს „არაკაცი“ უწოდა.

ადვოკატმა განაცხადა, რომ პოლიციელმა დაარღვია ელისაშვილის უფლებები დაკავების დროს, რადგან მან ზედმეტად მჭიდროდ დაადო ხელბორკილები და სიტყვიერი შეურაცხყოფა მიაყენა პოლიტიკოსს. ელისაშვილის რეპლიკა, გავრცელებული ინფორმაციით, მოყვა მათ შორის სიტყვიერ დაპირისპირებას 15 ივნისს სასამართლო პროცესზე, როდესაც ჭიპაშვილი მოწმის სახით აძლევდა ჩვენებას.

ეს უკანასკნელი ბრალდება უკვე მეოთხე სისხლის სამართლის საქმეა ელისაშვილის წინააღმდეგ, რომელიც 10 ივლისს სასამართლომ ტერორისტული აქტის ჩადენის მცდელობაში დამნაშავედ ცნო. ელისაშვილი 2025 წლის 29 ნოემბერს, გამთენიისას, თბილისის საქალაქო სასამართლოს კანცელარიის შენობის დაწვის მცდელობის ბრალდებით დააკავეს. მას 13 წლით თავისუფლების აღკვეთა მიესაჯა.

This post is also available in: