ესპანეთში, სლოვენიასა და ვატიკანში საქართველოს ახალი ელჩები ჰყავს

ესპანეთის სამეფოში, სლოვენიის რესპუბლიკასა და წმინდა საყდართან საქართველოს ახალი ელჩები ჰყავს, ნათქვამია საგარეო საქმეთა სამინისტროს პრესსამსახურის განცხადებაში.

ესპანეთის სამეფოში საქართველოს საგანგებო და სრულუფლებიან ელჩად ალექსანდრე ჭკუასელი დაინიშნა. იგი 2003 წლიდან საგარეო უწყებაში და საქართველოს დიპლომატიურ მისიებში სხვადასხვა პოზიციას იკავებდა. 2021 წლიდან დღემდე იგი საქართველოს გენერალური კონსული იყო ბარსელონაში. მანამდე იგი საინფორმაციო და საზოგადოებასთან ურთიერთობის გენერალური დირექტორატის პრესისა და ინფორმაციის დეპარტამენტის დირექტორი იყო.

სლოვენიის რესპუბლიკაში საქართველოს საგანგებო და სრულუფლებიანი ელჩის პოსტზე კონსტანტინე სურგულაძე დაინიშნა. კონსტანტინე სურგულაძე საგარეო უწყებაში 1997 წლიდან მუშაობს. სხავდასხვა დროს იყო ნიდერლანდების სამეფოსა და იტალიის რესპუბლიკაში  საქართველოს საგანგებო და სრულუფლებიანი ელჩი. 2012 წელს იგი საქართველოს სახელმწიფო მინისტრი იყო დიასპორის საკითხებში.  

წმინდა საყდართან საქართველოს საგანგებო და სრულუფლებიან ელჩად დაინიშნა დავით მექვაბიშვილი. იგი სხვადასხვა დროს მუშაობდა საგარეო საქმეთა სამინისტროში,  საქართველოში იერუსალიმის, როდოსისა და მალტის წმინდა იოანეს სახელობის სამხედრო სუვერენული ორდენის საელჩოში, ასევე იყო ააიპ კარდინალ პიო ლაგის ფონდის დირექტორი, მინიჭებული აქვს მალტის ორდენის ღირსების ორდენის კავალერის ჯილდო.

ასევე წაიკითხეთ:

• 27/03/2025 – თურქეთში, შვეიცარიაში, ლიხტენშტაინსა და კუბაში საქართველოს ახალი ელჩები ჰყავს
• 21/03/2025 – საქართველოს ავსტრიაში, ბელარუსში, არაბთა გაერთიანებულ საამიროებში, გაეროს ოფისში ჟენევაში და უზბეკეთში ახალი ელჩები ჰყავს
• 24/01/2024 – საქართველოს ჩინეთში, ისრაელში, იორდანიასა და ქუვეითში ახალი ელჩები ჰყავს

This post is also available in: English (ინგლისური)