ეუთოს 17 ქვეყანა: ვგმობთ "ქართული ოცნების" სასტიკ და გაუმართლებელ ძალადობას

განცხადებაში, რომელიც ნიდერლანდების წარმომადგენელმა წარუდგინა ეუთოს მუდმივმოქმედ საბჭოს, ვკითხულობთ:

"ჩვენი ერთგულება საქართველოს სუვერენიტეტისა და ტერიტორიული მთლიანობისადმი ურყევი რჩება, თუმცა ჩვენ მკაცრად ვგმობთ “ქართული ოცნების” სასტიკ და გაუმართლებელ ძალადობას საქართველოს მოქალაქეების მიმართ, რომლებიც იყენებენ მშვიდობიანი შეკრებისა და გამოხატვის თავისუფლების უფლებებს".

განცხადებას ხელს აწერენ შემდეგი ქვეყნები: ბელგია, კანადა, დანია, ესტონეთი, ფინეთი, საფრანგეთ, გერმანია, ლატვია, ლიეტუვა, ლუქსემბურგი, ნორვეგია, პოლონეთი, რუმინეთი, შვედეთი, გაერთიანებული სამეფო, აშშ, ნიდერლანდი.

"შეშფოთებული ვართ, რომ კრიტიკოსების გასაჩუმებლად “ქართული ოცნება” აგრძელებს რეპრესიული ტაქტიკის გამოყენებას, უსამართლო დაკავებისა და ფიზიკური ძალადობის ჩათვლით", - აღნიშნავენ განცხადების ხელმომწერები.

ისინი საქართველოს მთავრობას მოუწოდებენ, დაუყოვნებლივ გაათავისუფლოს აქციებისას დაკავებული დემონსტრანტები, ჟურნალისტები და ოპოზიციონერები.

პარალელურად ცნობილი ხდება, რომ დიდი ბრიტანეთისა და ჩრდილოეთ ირლანდიის გაერთიანებულმა სამეფომ 19 დეკემბერს სანქციები დაუწესა საქართველოს შინაგან საქმეთა მინისტრ ვახტანგ გომელაურსა და უწყების კიდევ ოთხ მაღალჩინოსანს.

ბრიტანეთის მთავრობის თანახმად, მათ სანქციებს უწესებენ, რადგან პასუხისმგებელნი არიან ჟურნალისტებსა და მშვიდობიან დემონსტრანტებზე ძალადობრივ თავდასხმებზე.

პროევროპული საპროტესტო დემონსტრაციები საქართველოში 22-ე დღეა, გრძელდება.

დემონსტრაციებისას პოლიციელებმა არაერთ ადამიანზე იძალადეს როგორც დაკავებისას, ასევე დაკავების შემდეგ.

სცემეს ჟურნალისტებიც.

სახალხო დამცველი იუწყება, რომ მისმა წარმომადგენლებმა 28 ნოემბრიდან 16 დეკემბრის ჩათვლით კლინიკებსა და იზოლატორებში მოინახულეს 362 ადამიანი. მათგან:

• 227 მიუთითებდა არასათანადო მოპყრობაზე;
• 158-ს აღენიშნებოდა ხილული დაზიანებები.