radiotavisupleba ახალი ამბები 
სატელიტური კავშირის სისტემა Starshield-მა მუშაობის სიჩქარე აღადგინა, - ამის შესახებ უკრაინის თავდაცვის მინისტრმა, ევჰენი ხმარამ რადიო თავისუფლების უკრაინულ რედაქციას უთხრა.
„უკრაინის თავდაცვის სამინისტროს მონიტორინგის სისტემები Starlink-ისა და Starshield-ის მუშაობის სიჩქარის აღდგენას აფიქსირებენ. ვაფიქსირებთ 400 კმ/სთ-ზე მეტ სიჩქარეს, კავშირი სტაბილურია“, - განაცხადა მან.
ხმარამ თანამგზავრების მუშაობის აღდგენას კიდევ ერთი მაგალითი უწოდა იმისა, თუ როგორ იძლევა „უკრაინის პრეზიდენტის პირდაპირი დიალოგი და მტკიცე პოზიცია“ შედეგებს, რომლებსაც მნიშვნელობა აქვს უკრაინელი სამხედროებისთვის, უპილოტო საფრენი აპარატების მუშაობისთვის, ლოგისტიკისა და კავშირისთვის.
„თავდაცვის სამინისტრო Starlink-ისა და Starshield-ის მუშაობის მონიტორინგსა და აღრიცხვას აგრძელებს“, - დასძინა თავდაცვის მინისტრმა.
23 ოქტომბერს უკრაინის პრეზიდენტმა ვოლოდიმირ ზელენსკიმ განაცხადა, რომ Starlink-სა და Starshield-ზე სიჩქარის შეზღუდვები კვლავ მოქმედებს.
მანამდე „რადიო თავისუფლების“ წყაროებმა უკრაინის თავდაცვის სამინისტროში, რომლებიც ვითარებას იცნობენ, აღნიშნეს, რომ 23 ოქტომბრის დილის მდგომარეობით, 161 კმ/სთ სიჩქარეზე კავშირის დაკარგვის შემთხვევები ფიქსირდებოდა. ამასთან, ჯერ არ არსებობს დადასტურება, რომ მოხსნილია შეზღუდვები სატელიტური სისტემა Starshield-ის მუშაობაზე. ეს ამერიკული კომპანია SpaceX-ის Starlink-ის სამხედრო ვერსიაა.
23 ოქტომბერს გამოცემა The Wall Street Journal-მა, აშშ-ის ოფიციალურ პირებზე დაყრდნობით, დაწერა, რომ აშშ-ის პრეზიდენტმა დონალდ ტრამპმა SpaceX-ის დამფუძნებელ ილონ მასკთან სატელეფონო საუბარი გამართა და მას Starshield-ის მუშაობაზე დაწესებული სიჩქარის შეზღუდვის მოხსნა სთხოვა.
გამოცემის წყაროების ცნობით, 22 ოქტომბერს ტრამპსა და მასკს შორის საუბრის შემდეგ მალევე სატელიტურმა კავშირმა უფრო სტაბილურად დაიწყო მუშაობა.
Starshield-ის - კომპანია SpaceX-ის Starlink-ის სამხედრო ვერსიის - მუშაობაში შეფერხებებმა უკრაინა განსაკუთრებით მოწყვლადი გახადა. ქვეყანა ამ სისტემას დიდწილად ეყრდნობა რუსეთის საჰაერო დარტყმებისგან თავდაცვისთვის. შეფერხებების შესახებ ინფორმაცია პირველად 13–14 ოქტომბერს გავრცელდა.
ამასთან Starlink-ის მუშაობაზე შეზღუდვების შესახებ ცნობები მას შემდეგ გავრცელდა, რაც აშშ-ის პრეზიდენტმა დონალდ ტრამპმა განაცხადა, რომ მიაღწია შეთანხმებას რუსეთის პრეზიდენტ ვლადიმირ პუტინთან რუსულ დიზელზე სანქციების დროებით შეჩერებისა და მის მსოფლიო ბაზარზე მიწოდების შესახებ. ამასთან, ტრამპმა უკრაინას რუსეთის ნავთობგადამამუშავებელ ქარხნებზე დარტყმების შეწყვეტისკენ მოუწოდა.
