radiotavisupleba ახალი ამბები 
უკრაინის პრეზიდენტი ვოლოდიმირ ზელენსკი შაბათს, სამუშაო ვიზიტის ფარგლებში, თურქეთში შეხვდება თავის თურქ კოლეგას, რეჯეპ თაიპ ერდოანს, რათა მოილაპარაკონ რუსეთთან ომსა და შავ ზღვაში უსაფრთხოების ვითარებაზე, განაცხადა თურქეთის პრეზიდენტის ადმინისტრაციამ.
„სტამბოლში შეხვედრისას მხარეები განიხილავენ ნაბიჯებს, რომლებიც შეიძლება გადაიდგას თურქეთსა და უკრაინას შორის ორმხრივი თანამშრომლობის შემდგომი გაძლიერებისთვის, ასევე რეგიონულ და საერთაშორისო მოვლენებს - უპირველეს ყოვლისა, რუსეთ-უკრაინის ომსა და შავ ზღვაში უსაფრთხოების ვითარებას“, - განაცხადა პრეზიდენტის ადმინისტრაციის კომუნიკაციების დირექტორმა, ბურჰანეთინ დურანმა პარასკევს X-ზე.
როგორც რუსეთთან, ისე უკრაინასთან არსებული ურთიერთობების მიუხედავად, თურქეთი აღაშფოთა შავ ზღვაში კომერციულ ხომალდებზე განხორციელებულმა თავდასხმებმა.
სექტემბერში გაეროს გენერალურ ასამბლეაზე გამოსვლისას ერდოანმა განაცხადა, რომ თავდასხმები „მიუღებელი“ იყო.
ანკარამ რუსეთსა და უკრაინას გაუგზავნა წინადადება სამოქალაქო გემებზე დარტყმების შეწყვეტის შესახებ, თუმცა ორმა მოწინააღმდეგე მხარემ მასზე რეაგირება ვერ მოახდინა.
პრეზიდენტის ადმინისტრაციის ცნობით, ერდოანი ზელენსკის ბოსფორის გადამყურე დოლმაბაჰჩეს ოფისში შეხვდება, რასაც პრესკონფერენცია მოჰყვება.
თურქეთმა ასევე უმასპინძლა მოლაპარაკებების რამდენიმე რაუნდს რუსეთსა და უკრაინას შორის ხანგრძლივი ცეცხლის შეწყვეტისა და მშვიდობის შეთანხმების მისაღწევად.
თურქეთის მმართველის ადმინისტრაციის ცნობით, ოთხშაბათს აშშ-ის პრეზიდენტ დონალდ ტრამპთან სატელეფონო საუბრისას ერდოანმა განაცხადა, რომ თურქეთი მზადაა მხარი დაუჭიროს ძალისხმევას უკრაინასა და რუსეთს შორის დიპლომატიური პროცესის განახლებისა და ომის მოლაპარაკებების გზით დასრულებისთვის.
