თბილისის საქალაქო სასამართლომ ბელარუსი თავშესაფრის მაძიებლის საქმის გადახედვის გადაწყვეტილება მიიღო

ბელარუსმა უფლებადამცველმა რომან კისლიაკმა საქართველოში თავშესაფრის მინიჭების თაობაზე სასამართლოში გარკვეულ წარმატებას მიაღწია, რადგან თბილისის საქალაქო სასამართლომ ნაწილობრივ დააკმაყოფილა მისი სარჩელი და დაადგინა, რომ შინაგან საქმეთა სამინისტროს მიგრაციის დეპარტამენტის მიერ გამოცემული ადმინისტრაციული აქტი ბათილად უნდა გამოცხადდეს, იტყობინება ბელარუსული საინფორმაციო გამოცემა Pozirk. კისლიაკის ადვოკატმა „სამოქალაქო საქართველოს“ დაუდასტურა, რომ სარჩელი ნაწილობრივ დაკმაყოფილდა და სასამართლომ მიგრაციის დეპარტამენტს საქმის ხელახლა შესწავლა დაავალა, თუმცა ეს ექვემდებარება გასაჩივრებას სააპელაციო წესით.

მანამდე, შსს-ს მიგრაციის დეპარტამენტი აცხადებდა, რომ მოსამართლემ არ უნდა დააკმაყოფილოს კისლიაკის სარჩელი ეროვნული უსაფრთხოებისთვის გაურკვეველი საფრთხის მოტივით.

კისლიაკმა, რომელსაც ტერორიზმის, ღალატისა და ბელარუსში ძალაუფლების ხელში ჩაგდების ბრალის წარდგენა ემუქრება, განაცხადა, რომ სასამართლოს გადაწყვეტილება იშვიათი წარმატებაა ბელარუსებისთვის, რომლებიც საქართველოში თავშესაფარს ეძებენ.

„ბელარუსებისთვის საქართველოში ეს პირველი შემთხვევაა, როცა საჩივარი თავშესაფრის მიცემაზე უარის თქმის შესახებ ნაწილობრივ მაინც დაკმაყოფილდა“, – აცხადებს Pozirk  კისლიაკის სიტყვებზე დაყრდნობით.

თბილისის საქალაქო სასამართლომ რამდენჯერმე გადადო საქართველოში თავშესაფრის მიცემაზე უარის თქმის შესახებ მისი საჩივრის განხილვა.

სასამართლო პროცესის დროს, საუბარი შეეხო ბელარუსში დეპორტაციის შემთხვევაში მისი სიკვდილით დასჯის შესაძლო საფრთხეს, განაცხადა მან. ბელარუსის სამართალდამცველებმა მას ბრალი წაუყენეს „ტერორისტულ აქტში თანამონაწილეობაში“, „სამშობლოს ღალატსა” და „ხელისუფლების ხელში ჩაგდების მიზნით შეთქმულების მოწყობაში“ და ამის მიზეზი ადამიანის უფლებების დაცვის სფეროში მისი საქმიანობა გახდა. სისხლის სამართლის კოდექსის სამივე მუხლი სიკვდილით დასჯას ითვალისწინებს.

Human Rights House Foundation-მა გააკრიტიკა ბელარუსის ხელისუფლება 2020 წელს რამან კისლიაკის დევნისა და იძულებით გაუჩინარების გამო.

Pozirk-ი იტყობინება ბელარუსის შინაგან საქმეთა სამინისტროს მონაცემებზე დაყრდნობით, რომ 2019 წლიდან 2024 წლამდე საქართველომ არც ერთ ბელარუსს არ მიანიჭა თავშესაფარი.

ანალოგიურად, 2024 წლის 18 სექტემბერს, მიგრაციის დეპარტამენტმა აზერბაიჯანელ ჟურნალისტ აფგან სადიგოვს, Azel.tv-ის მთავარ რედაქტორს, თავშესაფარზე უარი უთხრა.  

ასევე წაიკითხეთ:

• 28/02/2024 – 2023 წელს საქართველოდან ევროკავშირში თავშესაფრის მოთხოვნით განაცხადების რაოდენობა 12%-ით შემცირდა
• 08/09/2022 – IDFI-ის კვლევა რუსეთის და ბელარუსის მოქალაქეებზე საქართველოში

This post is also available in: English (ინგლისური)